Aqtóbede 60 mlrd teńgege shyny ydys shyǵaratyn zaýyt salynady
ASTANA. KAZINFORM – Aqtóbe qalasynda jylyna 256 mln dana shyny ydys óndiretin zaýyt salynady. Jobaǵa 60 mlrd teńge ınvestıtsııa tartý josparlanǵan, dep habarlaıdy Úkimet.
Premer-mınıstr Oljas Bektenov Ónerkásip jáne qurylys mınıstrligi men Aktobe Steklo JShS arasynda ınvestıtsııalar týraly kelisimge qol qoıýdy maquldaıtyn qaýlyǵa qol qoıdy.
Joba Memleket basshysynyń óńdeý ónerkásibine ınvestıtsııa tartý, ımportty almastyrý jáne otandyq óndiristi damytý jónindegi tapsyrmalary aıasynda júzege asyrylady.
Kásiporyn qurylysyn 2026 jyldyń tórtinshi toqsanynda bastaý, al 2029 jyly paıdalanýǵa berý josparlanǵan.
Jobanyń jalpy ınvestıtsııalyq quny – 60 mlrd teńge. Zaýyt tolyq qýatyna shyqqan kezde jylyna 256 mln dana shyny ydys óndire alady.
Qazirgi ýaqytta Aqtóbe oblysynda shyny ónimderin shyǵaratyn jergilikti óndiris joq. Jańa kásiporyn osy olqylyqtyń ornyn toltyryp, ishki naryqtaǵy otandyq shyny ydys kólemin arttyrýǵa múmkindik bermek.
– Kásiporyn ónimderiniń 80%-na deıin Qazaqstanda satý, qalǵan bóligin Ortalyq Azııa elderiniń naryqtaryna shyǵarý josparlanýda. Óndiris shıkizatty suryptaýdyń, tehnologııalyq úderisterdi basqarýdyń jáne sapany baqylaýdyń zamanaýı avtomattandyrylǵan júıelerimen jaraqtandyrylatyn bolady. Ónimdi shyǵarý kezinde otandyq tabıǵı mıneraldy shıkizatty, sondaı-aq qazaqstandyq óndirýshilerdiń taýarlaryn, jumystary men qyzmetterin paıdalaný josparlanýda, – delingen Úkimet habarlamasynda.
Joba aıasynda óndiriste qaıtalama shıkizatty paıdalaný úlesin birtindep arttyrý kózdelgen. Atap aıtqanda, jobany qarjylandyrý kezeńinde 245 myń tonnadan astam shyny qaldyǵyn qaıta óńdep, óndiriste qaıta paıdalaný josparlanyp otyr.
Zaýyt iske qosylǵannan keıin 300-ge jýyq turaqty jumys orny ashylady. Qazaqstandyq mamandar úshin úzdiksiz oqytý jáne biliktilikti arttyrý baǵdarlamalary qarastyrylǵan.
Jańa óndiris tamaq jáne qaıta óńdeý ónerkásibiniń damýyna da yqpal etpek. Otandyq shyny ydys kóleminiń artýy ónim jetkizý merzimderin qysqartyp, basqa kásiporyndardy qajetti qaptamamen turaqty qamtamasyz etýge múmkindik beredi.
Sonymen qatar shyny qaldyqtaryn jınaý, suryptaý, qaıta óńdeýge daıyndaý jáne olardy óndiriste qaıta paıdalaný baǵytyndaǵy jumystar damıdy.
Aıta keteıik, buǵan deıin Aqtóbede sheteldik ınvestorlardyń qatysýymen alkogolsiz sýsyn shyǵaratyn zaýyt salý týraly ınvestıtsııalyq kelisimge qol qoıylǵan edi.
