Aqtóbede 6 mlrd teńge qalaı talan-tarajǵa tústi

AQTÓBE.KAZINFORM — Qytaılyq kompanııanyń qarjysyn qolma-qol aqshaǵa aınaldyrǵan aqtóbelikter sottaldy. Olar muny basshylarynyń nusqaýymen istep, memlekettik organdarǵa aı saıyn, keıbirine jyl saıyn aqsha berilgenin aıtty. Shyǵyn 6 mlrd teńgeden asady. 

№ 2 Aqtóbe qalalyq sotynda sheteldik kompanııanyń bas dırektorynyń orynbasary, esepshisi men onyń týystary Gúlnar Orazova, Saltanat Kongaleeva, Erlan Kongaleev, Saıat Beısenbaı, Gúlnara Abdýllınaǵa qatysty is qaraldy. Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý», «Qylmystyq jolmen alynǵan aqshany jáne (nemese)ózge múlikti zańdastyrý (jylystatý)» baptary boıynsha aıyp taǵyldy. Іs birneshe epızodqa bólindi. Qaýlyǵa sáıkes «Tý-Ha» JShS-i uńǵymalardyń kúrdeli jóndeý, uńǵymalardyń qujattaryn rásimdeý, jerasty jumystaryn júrgizý, jobalaý, munaı óndirý jáne óńdeý, burǵylaý qurylǵylaryn jóndeý, munaı-gaz óńdeý nysandaryn salý sekildi jumystardy iske asyra alady. Sottalýshy Saltanat Kongaleeva 2005 jyly dál osy «Tý-Ha» JShS-ne esepshi bolyp ornalasady. Sondaı-aq sottalýshy Gúlnar Orazova 2004 jyly «Tý-Ha» JShS-ne esepshi bolyp kirip, 2007 jyly bas dırektordyń orynbasary qyzmetine kóteriledi. Saltanat Kongaleeva men Gúlnar Orazova 2007 jyldyń sáýir aıy men 2021 jyldyń sáýir aıyna deıin asa iri kólemde paıda tabýdy oılap, ony iske asyrady. Qylmystyq isti júzege asyrý úshin Gúlnar Orazova 2004 jyly tirkelgen «Kompanııa Azımýt» JShS-in paıdalanady. Sóıtip 2007 jyldyń sáýir aıynan bastap Saltanat Kongaleeva Gúlnar Orazovaǵa tıesili kompanııanyń esepshotyna aqsha aýdarady. Aldymen 760 725 teńge, keıin 1 275 000, 2 701 442, 2 824 000, 3 596 200, 2 948 400 teńge aýdarady. Aýdarmada taýar alýǵa, kólik qyzmetine dep kórsetedi. Sóıtip 14 105 767 teńge óz qajettiligine jumsaldy. 2007 jyly Saltanat Kongaleeva men Gúlnar Orazova jymysqy áreketin ári qaraı jalǵastyryp, «Kilt» JShS-ne jalpy somasy 42 203 500 teńge aýdarady. Bul kezde «Tý-Ha» JShS men «Kilt» JShS-i arasynda qandaı da bir kelisim bolmaǵan. 2008 jyly «Invest Holdıng Kazahstan» JShS-ne jalpy somasy 34 124 590 teńge aýdarǵan. Іs materıalynda Saltanat Kongaleevanyń 2006 jyly tirkelgen «Megalot HHH» JShS-ne ıelik etetini týraly jazylǵan. Ol esepshi bolyp jumys istep júrip 2009-2021 jyldary aralyǵynda óz kompanııasyna 1 988 961 500 teńge aýdaryp aldy. Dál osy qarjynyń 50 550 000 teńgesi Gúlnar Orazovaǵa aýdarylǵan. Osy arada iske Gúlnar Orazovanyń kúıeý balasy A.Muqanov ta kirisken. «TehPlıýsServıs» JShS-ne 58 065 105 teńge bólindi. «Megalot HHH» JShS-inen kómek retinde sottalýshy Saıat Beısenbaıǵa 8 300 000 teńge aýdaryldy. Qalǵan qarjyny Saltanat Kongaleeva qolma-qol sheship alyp, keıin «Nýraı Invest Grýpp» JShS-niń shotyna salady. Bul seriktestik onyń anasy M. Djýlanovanyń atynda. Ári qaraı S. Kongaleeva men G.Orazova A. Syıykovaǵa ótinish tastaıdy. Ol S. Kongaleevanyń qurbysy ári «Syıykova Aınýr Mendıbaevna» jeke kásipkerliginiń ıesi. 2010 jyldyń shildesi men 2010 jyldyń tamyzy aralyǵynda 16 543 086 teńge aýdarady. 2010 jyly esepshi bas dırektorǵa aıtpaı «BELAıA STRELA» JShS-ne 2 800 000 teńge bóldi. Onyń dırektory S. Kongaleevanyń dosy boldy. Іstegi sottalýshy S. Beısenbaı esepshi S. Kongaleevanyń kúıeýi. Aldyn ala kelisip, «Beısenbaı Saıat Ermekuly» jeke kásipkerligin tirkep, qarjy jymqyrýdy jalǵastyrady. 2010-2014 jyldary aralyǵynda 167 901 066 teńgeni zańsyz ıemdendi. Osy jolmen «Abdýllına Gýlnara Maratovna» jeke kásipkerligine 79 668 490 teńge, «Abdýllına Malıka» jeke kásipkerligine 91 854 731 teńge, «Ýrazova Darııa Jýmabaevna» JK-ne 48 232 285 teńge, «Maıkeeva» JK-ne 44 421 600 teńge, «Gýron Plıýs» JShS-ne 4 705 129 teńge, «Aset» JK-ne 124 880 200 teńge, «Jıger Azııa Grýpp» JShS-ne 356 486 991 teńge, «Hasanov» JK-ne 77 822 084 teńge, «Mýsına A.S.» JK-ne 29 000 000 teńge, «Nýrmýhamedov Dastanbek Begdýllaevıch» JK-ne 37 700 000 teńge, «Isagalıeva» JK-ne 32 000 000 teńge. «Trans Logıstık» JShS-ne 1 664 572 932 teńge aýdardy. Sóıtip sottalýshylar Gúlnar Orazova, Saltanat Kongaleeva, Erlan Kongaleev, Saıat Beısenbaı, Gúlnara Abdýllına jalpy somasy 6 116 310 603 teńge shyǵyn keltirdi. Gúlnar Orazova, Saltanat Kongaleeva birigip, Aqtóbe qalasy ortalyǵynan jer alyp, «ıÝrta Park» oıyn-saýyq ortalyǵyn ashty. Jer Saltanat Kongaleevanyń anasy M.Jolanovaǵa tıesili. «Prıntsessa Sabına» kesheni Saltanat Kongaleevanyń jeńgesine tıesili. Qarjynyń bir bóligi bankterdegi depozıtinde saqtaýly. Sottalýshy Gúlnar Orazova da jymqyrǵan qarjynyń bir bóligine depozıt ashty. Sot otyrysynda sottalýshy Saltanat Kongaleeva taǵylǵan aıypty moıyndamady. Qytaılyq basshylarynyń uıǵarymymen qolma-qol aqshaǵa aınaldyrǵanyn aıtty. Ol óz sózinde «Tý-Ha» JShS-i «SNPS» kompanııasynyń quramdas bóligi ekenin, qandaı bir bazasy bolmasa da únemi satyp alýda jeńiske jetetinin, osylaısha sheteldik jumys kúshin tartýǵa baǵyttalǵanyn jetkizdi. Іste qytaılyq kompanııaǵa basshylyq etken Oý Denfý, Lı Sınhýa, Tıen, Pan Jýnpın esimderi atalady. Sot otyrysy kezine sottalýshy 2004-2020 jyldar aralyǵynda kompanııanyń tabysy 32 mlrd teńge shamasynda bolǵanyn aıtty. Saltanat Kongaleeva aı saıyn Aqtóbe oblystyq eńbek departamentine, Aqtóbe oblysy ákimdigine sheteldik jumys kúshin tartý, jyl saıyn oblystyq ekologııa departamentine hımreagentter qoldaný, kóshi-qon qyzmetine qytaılyqtardyń Qazaqstan terrıtorııasyna kirýi úshin aqsha bergeni týraly aqparatty aıtty. Sonymen birge keden, prokýratýraǵa qatysty derekter bar. Sotta jábirlenýshi taraptyń ókili, «Tý-ha» JShS-niń advokaty munyń bári dırektor Tsao Sıanıýan anyqtap, kúdik uıalatqan soń tekserý júrgenin aıtty.

Sot úkimimen Saltanat Kongaleeva, Gúlnar Orazova aıypty dep tanylyp, túpkilikti 8 jylǵa bos bostandyǵynan aıyrylyp, múlki tárkilendi. Erlan Kongaleev 7 jylǵa sottaldy. Saltanat Kongaleeva jazasyn 5 jyldan soń keıin óteıdi. Gúlnar Abdýllına, Saıat Beısenbaı aıypty dep tanylǵanymen qylmys merzimi ótip ketken soń jaýapkershilikten bosatyldy. Sot «Tý-ha» JShS-niń azamattyq talap aryzyn tolyq qanaǵattandyrdy. Saltanat Kongaleeva, Gúlnar Orazova, Gúlnar Abdýllınadan birlesken túrde 219 755 506 teńge materıaldyq shyǵyn, Saltanat Kongaleeva, Gúlnar Orazova, Saıat Beısenbaıdan 471 902 866 teńge materıaldyq shyǵyn, Saltanat Kongaleeva, Gúlnar Orazova, Erlan Kongaleevten 640 303 900 teńge óndirý týraly sheshim shyǵardy. Sonymen birge Saltanat Kongaleeva, Gúlnar Orazova birlesken túrde kompanııaǵa 4 784 348 329 teńge materıaldyq shyǵyndy qaıtarýy tıis. Al ókildiń shyǵynyn óndirý ótinishi ishinara qanaǵattandyryldy.

Buǵan deıin habarlaǵanymyzdaı, Qazaqstanda qylmystyq isterdiń 90 paıyzy elektrondyq formatta tergelip jatyr. Bul qylmystyq istermen aıla-sharǵy jasaýǵa, ıaǵnı materıaldardy joıýǵa nemese túzetýge jol bermeıdi, dáleldemelerdi jınaý protsesiniń ashyqtyǵy men obektıvtiligin qamtamasyz etedi.