Aqtóbede 6 mektep paıdalanýǵa beriledi
AQTÓBE. QazAqparat - Aqtóbe qalasynda 10 mektep salynyp jatyr. Bıyl 6 mekteptiń qurylysy aıaqtalyp, paıdalanýǵa beriledi, dep habarlaıdy QazAqparat tilshisi.
Aqtóbe qalasynda «Nurly jol» baǵdarlamasy aıasynda 10 mekteptiń qurylysy júrip jatyr. Onyń tórteýi ótken jyldan 2017 jylǵa aýysqan joba. Mektepterdiń bári halyq tyǵyz ornalasqan jańa aýmaqtarǵa salynyp jatyr.
«Qalamyzda on mekteptiń qurylysy júrip jatyr. Qurylys jumystarynyń merdigerleri anyqtalyp, jumys bastaldy. Bıyl taǵy eki mekteptiń qurylysyn júrgizý úshin qarjy bólinedi. Qazirgi ýaqytta memlekettik satyp alý jumystary júrgizilip jatyr. Aldaǵy ýaqytta kelisim shartqa qol qoıyp, bıyl jumys bastalady degen jospar bar. Negizinen bıyl 6 mekteptiń qurylysy aıaqtalyp, paıdalanýǵa beriledi. Onyń tórteýi jańa oqý jylynda, ekeýi qarasha aıynda iske qosylady», - dedi Aqtóbe qalasy ákiminiń orynbasary Jandos Baıyrhanov. «Nurly jolmen» salynyp jatqan mektepterdiń ishki dızaınyn arnaıy mamandar daıyndaıdy. Bul oblys ákimi Berdibek Saparbaevtyń tapsyrmasymen iske asyrylyp jatqan jumys.
«Keıbir mektepter qurylys ýaqytynan buryn salynyp jatyr. Máselen, Batys-2, Sazdy yqsham aýylyndaǵy 600 oryndy mektepterdi tapsyrý jeltoqsan aıyna josparlanyp edi. Biz tamyzda aıaqtap, jańa oqý jylynda paıdalanýǵa beremiz. Negizinen «Nurly jol» baǵdarlamasy aıasynda qala mektepterine 12 mıllıard teńge bólindi. Qazigi ýaqytta 800 mıllıon teńgeden astam qarjy ıgerildi», - dedi Jandos Baıyrhanov.
