Aqtóbede 6 adam sýǵa ketken soń atty polıtseıler ózen jaǵasyn kúzetýge kóshti
AQTÓBE. QazAqparat – Aqtóbede sýǵa túsý maýsymy bastalǵan joq. Qaıǵyly oqıǵanyń kóbeıýine baılanysty atty polıtseıler kúzetti kúsheıtti, dep habarlaıdy QazAqparat tilshisi.
Aqtóbe oblysynda bıyl 6 adam sýǵa batyp ketti. Onyń úsheýi bala. Tótenshe jaǵdaılar qyzmeti saqtyq sharasyn kúsheıtý maqsatynda búgin atty polıtseılermen birge baqylaýdy kúsheıtti.
«Sýǵa túsý maýsymy 1 maýsym kúni bastalady. Qazirgi kezde kún ystyq. Degenmen sýdyń áli salqyn ekenin umytpaǵan jón. Turǵyndar tabıǵat aıasynda demalyp, shomylýdy bastap ketken. Sýǵa túsedi. Al sýdyń bir bóligi jylynǵanymen, ózen tabany sýyq. Sol kezde adam denesi qurysyp qalady. Ári ishimdik iship, sýǵa túsý óte qaýipti»,- dedi oblystyq TJD bastyǵynyń orynbasary Qaırat Qasym.
Baqylaýdy kúsheıtken atty polıtseılerdiń negizgi mindeti – saıajaı aýmaǵy men kóshelerinde tártiptiń saqtalýyn qadaǵalaý.
«Jyl basynan beri oblystyń sý aıdyndarynda 6 adam sýǵa batyp ketti. Onyń 3-i bala. Jaǵdaıdy baqylaý úshin atty polıtsııa qyzmetkerleri jaǵajaılardy baqylaýǵa shyǵady. Jergilikti kólder men ózenderdiń janynda 10-ǵa jýyq patrýldeý marshrýttary ázirlendi. Olardyń 8-i atty polıtsııanyń baqylaýynda bolady. 16 atty polıtseı jumysqa jumyldyryldy», - dedi PD JPQB bastyǵy Ardana Saımaǵambetov.
Qyzmet atqarý ýaqyty saǵat 15.00-den 22.00-ge deıin. Olar Qarǵaly jáne Elek ózenderiniń jaǵasynda ornalasqan jaǵajaılar men saıajaı aýmaǵynda júredi.
