Aqtóbede 55 jastaǵy áıeldi qaǵyp óltirgen júk kóliginiń júrgizýshi esirtki tutynǵan
AQTÓBE. QazAqparat - Aqtóbedegi Keńes Nokın dańǵylynda jol-kólik apaty tirkelip, 55 jastaǵy áıel qaza boldy. Polıtsııa júk kóligi júrgizýshisiniń eskirtki tutynǵanyn anyqtady, dep habarlaıdy QazAqparat tilshisi.
Jol apaty bolǵan jerge jedel jetken polıtsııa KaMAZ kóliginiń júrgizýshisin ustady. 27 jastaǵy júrgizýshi esirtki qoldanǵan. Al jaıaý júrginshi belgilenbegen jerden joldy kesip ótpek boldy.
«Jol-kólik apaty kezinde 55 jastaǵy áıel kóz jumdy. Qazirgi kúni Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha is qozǵaldy. Birneshe sot-medıtsınalyq saraptama taǵaıyndaldy. Kúdikti ýaqytsha tergeý ızolıatorynda otyr. Tergeý jumystary jalǵasyp jatyr», dep habarlady Aqtóbe oblystyq ІІD baspasóz qyzmetinen.
Aıta keteıik, taıaýda ǵana Aqtóbe qalasyndaǵy Aqtóbe-Orsk tasjolynda 37 jastaǵy áıel qaza boldy . Jyl basynan beri Aqtóbede 600-ge jýyq jol-kólik apaty tirkelip, 738 adam túrli jaraqat aldy. Al 67 adam mert boldy.
