Aqtóbede 52 adamnan AITV ınfektsııasy anyqtaldy

AQTÓBE. KAZINFORM — Oblysta bıyl AITV ınfektsııasyn juqtyrǵandardyń kóbi er adamdar. Basym bóligi ınfektsııany jynystyq qatynas arqyly juqtyrǵan.

Aqtóbe oblysynda AITV juqtyrý deregi jyl ótken saıyn azaıyp keledi. Elimiz boıynsha qazir 17-i orynda tur. Degenmen áli de jyl saıyn ondaǵan adamnan anyqtalyp, tirkelip jatyr. Jyl basynan beri 52 adamnan AITV ınfektsııasy anyqtaldy. Bylǵyr 11 aıda 57 adamnyń dertke shyldyqqany belgili boldy.

— Bıyl AITV ınfektsııasyn juqtyrǵan adamdardyń bári Qazaqstan azamattary. Onyń 40-y er adamdar. Kóbi ınfektsııany jynystyq qatynas arqyly juqtyryp alǵan. Olardyń sany — 45. Soǵan qaramastan elimiz boıynsha óńirde juqtyrý kórsetkishi úsh ese tómen. AITV juqtyrǵan adamdar turaqty em alyp júr. Infektsııa juqtyrǵanyn qaıdan biledi? AITV ortalyǵynan, túrli otaǵa daıyndalyp júrgende emhanadan, sonymen birge úkimettik emes uıymdardyń aldyn alý sharasy kezinde anyqtalyp jatady. Jyl ótken saıyn adamdardy tekserý kórsetkishi artyp otyr. Naqtyraq aıtsaq, jyl saıyn oblystyń árbir besinshi turǵyny, ıaǵnı, 233 myńnan astamy tekserildi, — dedi Aqtóbe oblystyq AITV ınfektsııasynyń aldyn alý ortalyǵy jetekshisiniń orynbasary Anna Kaspırova.

Aqtóbe oblysynda qazir AITV juqtyrǵan 617 adam tirkeýde tur. Onyń 16-y JITS deńgeıine jetken. AITV juqtyrǵandar jalpy tórt satysy bar. Onyń eń aýyry — tórtinshi saty.

Aıta keteıik, Qazaqstanda AITV-nyń aldyn alý, anyqtaý jáne emdeý júıesi kúsheıtildi. Búginde antıretrovırýstyq terapııa (ART) qabyldap júrgen AITV-men ómir súretin adamdardyń 93%-dan astamynda vırýs júktemesi tómen. Bul — memleket, halyqaralyq uıymdar jáne úkimettik emes qurylymdardyń birlesken jumysynyń nátıjesi.