Aqtóbede 500 myń gektardan astam jer memleket menshigine qaıtaryldy

AQTÓBE. QazAqparat - Aqtóbe oblysynda paıdalanylmaı jatqan aýyl sharýashylyǵy maqsatyndaǵy 500 myń gektardan astam jer memleket menshigine qaıtaryldy. Bul týraly aýyl sharýashylyǵy maqsatyndaǵy jerlerdi tıimdi paıdalaný máselelerine arnalǵan jıyn barysynda aıtyldy, dep habarlaıdy QazAqparat.

Aýyl sharýashylyǵy basqarmasynyń málimetinshe, Aqtóbe oblysynda aýyl sharýashylyǵy jerleriniń jalpy kólemi 26,5 mıllıon gektardan astam, onyń ishinde jaıylymdyq jerler – 24,8 mln gektardy quraıdy. Aýyl sharýashylyǵy aınalymyna 12,5 mln gektardan astam jer paıdalanylady. Paıdalanylmaı jatqan aýyl sharýashylyǵy jerleriniń 524,8 myń gektary jalǵa berý sharttaryn merziminen buryn buzý arqyly memlekettik jer qoryna qaıtaryldy, onyń 39,2 myń gektary – egistik jerler.

«Aýyl sharýashylyǵy qorynyń paıdalanylmaı jatqan jerlerin anyqtap, memleket paıdasyna alyp qoıýmen birge, onyń utymdy paıdalanylýyn qamtamasyz etý qajet», - dedi oblys ákimi Ońdasyn Orazalın.

Aıta keteıik, qazirgi kezde Aqtóbe oblysyndaǵy eldimekenderdiń jalpy jaıylymdyq kólemi 3,8 mln gektardy quraıdy.