Aqtóbede 500 kásiporyn jumysshylarynyń jalaqysyn kóterýge ýáde berdi
AQTÓBE. QazAqparat - Aqtóbede ortasha jalaqy - 126,1 myń teńge. Bıyl 500 kásiporyn óz jumysshylarynyń eńbekaqysyn kóterýge ýáde berdi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev eńbek ujymdarymen kezdesip, úshjaqty memorandýmǵa qol qoıýdy júrgizgen bolatyn. Qazirgi ýaqytta bul jumys jalǵasyp jatyr. Ótken jyly óńirde ortasha jalaqy 7,3 paıyzǵa ósip, 126,1 myń teńgeni qurady. Aqtóbe oblysy ákiminiń baspasóz qyzmetiniń habarlaýynsha, jalaqynyń ósý qarqyny boıynsha aımaq Qazaqstan óńirleri arasynda jetekshi orynǵa ıe bolǵan.
«Oblystyń kásiporyndarynda kelisimderdiń oryndalýyna baılanysty turaqty jaǵdaı saqtalyp otyr. Áleýmettik tólemder men jalaqy ýaqyty berilýde. Aldaǵy ýaqytta jumysshylardyń eńbekaqysyn kóterý, eń tómen jalaqy alatyn adamdardyń jalaqysyn arttyrý boıynsha jumys jalǵasýy tıis», - dedi oblys ákimi Berdibek Saparbaev.
Aqtóbe oblystyq eńbek ınspektsııasynyń basshysy Mırbolat Raıymqulovtyń aıtýynsha, ótken jyly 53 iri kásiporyn men servıstik kompanııa jalaqyny 7 paıyzdan 20 paıyzǵa deıin ósirdi. Sonymen qatar, memlekettik merekeler kezinde syıaqy tólep otyr. Bıyl qańtar aıynan bastap oblysta 4 771 memorandýmǵa qol qoıyldy. Ári 500 kásiporyn jalaqyny kóterý týraly mindetteme aldy. Jıyn kezinde óńir basshysy Berdibek Saparbaev memorandýmdardyń oryndalýyn turaqty baqylaýda ustaýdy tapsyrdy.
