Aqtóbede 500-den astam sottalǵan jumyspen qamtylǵan
AQTÓBE. KAZINFORM – Bıyl mekemeniń óndiristik aımaǵynda taǵy 10 shaǵyn jáne orta kásip iske qosylǵan. Jazasyn óteýshiler tósek-oryn, túrli arnaıy kıimder tigip, qurylys materıaldaryn da shyǵarady.
Aqtóbe oblysy boıynsha Qylmystyq-atqarý júıesi departamenti baspasóz qyzmetiniń habarlaýynsha, óńirde myńǵa jýyq sottalǵan jazasyn ótep otyr. Búginde onyń 500-den astamy jumyspen qamtylǵan.
- Qylmystyq-atqarý júıesi departamenti №8 mekemesiniń bazasynda 22 shaǵyn jáne orta bıznes sýbektisi jumys isteıdi. Olar bylǵary buıymdaryn, jylý qaptamalaryn, rezeńke buıymdaryn shyǵarady. Júrginshiler jolyna arnalǵan tas ta óndiriledi. Balyq ónimderi de bar. Byltyrǵa qaraǵanda óndiris oryndarynyń sany 10-ǵa artty,- dedi Aqtóbe oblysy boıynsha Qylmystyq-atqarý júıesi departamenti bastyǵynyń orynbasary Qanat Alpysbaev.
Jazasyn óteý mekemesinde óndiris aımaǵy bar. Onda jańa angar jáne modýldik ǵımarattar ornalasqan. Endi jańa óndiristik tseh pen sańyraýqulaq ósirýge arnalǵan jylyjaı iske qosyldy.
Aıta keteıik, Shyǵys Qazaqstan oblysyndaǵy túzeý mekemelerinde eńbekke qabiletti 2 myńǵa jýyq sottalǵannyń 1 475-i jumyspen qamtylǵan.
