Aqtóbede 500-den astam páter zańsyz jalǵa berilgen
AQTÓBE. QazAqparat - Aqtóbede polıtsııa qyzmetkerleri 200-myńnan astam úı men páterdi aralady. 500-den astam páter zańsyz jalǵa berilgeni anyqtalǵan, dep habarlaıdy QazAqparat tilshisi.
Óńirde 1 qyrkúıekten bastap «Ýchaske» jedel-aldyn alý sharasy ótip jatyr. Ýchaskelik polıtsııa ınspektorlary eki aı ishinde 200 myńnan astam tekserý jumystaryn júrgizdi.
«Onyń ishinde 115 myńnan astam páter men 103 myń jeke úıdi aralady. Nátıjesinde 500-den astam páterdiń zańsyz jalǵa berilgeni anyqtaldy. Barlyq fakti boıynsha turǵyn úı ıelerine ákimshilik sıpattaǵy sharalar qabyldaý úshin salyq organdaryna jiberildi», - deıdi Aqtóbe oblysy PD JPQB aǵa ınspektory Asylhan Bekbosynov.
Sonymen birge 814 adam ishki ister organdarynyń esebine alyndy. Jedel aldyn alý sharasy aıasynda atys qarýy bar azamattarǵa da tekserý júrgiziledi. Atap aıtqanda, 6706 qarý ıesi tekserildi. Onda qarýdy saqtaý erejelerin buzǵany úshin 81 azamat jaýapqa tartyldy. Bul rette zańsyz aınalymnan 25 birlik qarý tárkilendi.
«Osy aralyqta kóshe kezip, qaıyr surap júrgen 454 kámeletke tolmaǵan bala jetkizildi. Onyń 21-i kámeletke tolmaǵandardy beıimdeý ortalyǵyna ornalastyryldy. Balalarsyn qaraýsyz qaldyrǵan 56 ata-ana jaýapqa tartyldy. Sondaı-aq, turǵylyqty jeri boıynsha 1200-den astam sheteldik azamat tekserildi. Kóshi - qon zańnamasyn buzǵany úshin TMD-nyń 13 azamaty shekaradan shyǵaryldy», - dedi Asylhan Bekbosynov.
Turǵylyqty jeri joq 47 adam ustaldy, onyń 25-i qabyldaý-taratý ornyna ornalastyryldy.
