Aqtóbede 50 myń teńge para alǵan polıtsııa qyzmetkeri kinásin tolyq moıyndady
AQTÓBE. QazAqparat - Aqtóbede eski tanysynyń balasyn ákimshilik jaýapkershilikten qutqaryp qalmaq bolǵan polıtsııa qyzmetkeri 50 myń teńge para alǵan.
Búgin aıyptalýshy Aıbek Tashpenov sotta bar kináni moıyndap, ókinetinin aıtty, dep habarlaıdy QazAqparat tilshisi.
Aqtóbedegi ákimshilik polıtsııa basqarmasynda jumys istegen Aıbek Tashpenov osy jylǵy 18 aqpannan 19 aqpanǵa qaraǵan túni Aqjar-2 aýylynda kúdikti kóringen kólikti toqtatady. Sebebi, júrgizýshi qujatsyz, kóliktiń jaryǵyn jaqpastan aýyl ishinde júrgen.
«Kólik maǵan tanys kórindi. Biraq esime túsire almadym. Ol buryn Temir aýdany, Sarkól aýylynda kórshi bolǵan Qadyrjan esimdi tanysymnyń balasy bolyp shyqty. Ol úlken balasynyń isti bolǵanyn, ekinshi ulynyń atyn kirlemeý úshin kómektesýin, ákimshilik hattama toltyrmaýdy surady. Sol kezde 50 myń teńge suradym. Ol 20 myń teńge berdi»,- dedi aıyptalýshy Aıbek Tashpenov.
Іs materıaldaryna súıensek, aıyptalýshy 20 myń teńgeni alǵan soń qalǵan 30 myń teńgeni surap, jábirlenýshige telefon shalǵan. Aıbek Tashpenov 30 myń teńge para alý kezinde ustalyp, sotta bar kinásin moıyndady.
«Otbasym, bala-shaǵam bar. Jazany jeńildetýdi suraımyn. Bar kináni moıyndaımyn»,- dedi sotta A.Tashpenov. Qazirgi ýaqytta is qysqartylǵan tártipte ótip jatyr. Osy aptada Qylmystyq kodekstiń «Para alý» baby boıynsha qylmystyq iske sot úkimi shyǵady. Burynǵy polıtsııa qyzmetkeri 2,5 mıllıon teńge aıyppul tólep, 5 jylǵa deıin bas bostandyǵynan aıyrylýy múmkin. Sonymen qatar, múlki tárkilenip, ómir boıy quqyq qorǵaý salasynda eńbek ete almaıdy.
