Aqtóbede 50-ge jýyq jas Street Dance Battle baıqaýynda baq synady
AQTÓBE. KAZINFORM — 12 tamyz — Halyqaralyq jastar kúnine oraı Aqtóbe qalasynyń jastary arasynda «Street Dance Battle 2026» zamanaýı bı baıqaýy uıymdastyryldy.
Sharanyń basty maqsaty — jastardyń shyǵarmashylyq qabiletin damytý, zamanaýı bı mádenıetin nasıhattaý jáne talantty jastarǵa óz ónerin kórsetýge múmkindik berý. Baıqaýǵa Oral qalasynan kelgen qatysýshylar da qosylyp, jalpy sany 50-ge jýyq jas ózara baq synasty.
Qatysýshylar zamanaýı bı baǵyttary boıynsha óner kórsetip, ózderiniń sheberligi men shyǵarmashylyq qabiletterin ortaǵa saldy. Qarqyndy báseke men erekshe qoıylymdar kórermenderge kóterińki kóńil-kúı syılap, jastar arasynda dostyq ári shyǵarmashylyq atmosfera qalyptastyrdy.
Baıqaý qorytyndysy boıynsha úzdik óner kórsetken jeńimpazdar anyqtalyp, qarjylaı syılyqtarmen marapattaldy. «Street Dance Battle 2026» baıqaýy jastardyń ónerge degen qyzyǵýshylyǵyn arttyryp, ár óńirdiń talantty jastaryn bir alańda toǵystyrǵan mazmundy shara boldy.
