Aqtóbede 50-den astam adamdy kene shaǵyp, dárigerge qaraldy

AQTÓBE. KAZINFORM – Aqtóbedegi 38 eldi meken aýmaǵynda týlıaremııanyń tabıǵı oshaǵy bar. Búginde dezınsektsııa jáne deratızatsııa jumysy bastaldy.

Kene shyqqannan týlıaremııa, Kongo-Qyrym gemorragııalyq qyzbasy, kene entsefalıti, borrelıoz aýrýlary taralýy múmkin. Degenmen Aqtóbe oblysynyń aýmaǵynda Kongo-Qyrym gemorragııalyq qyzbasy, entsefalıt aýrýlarynyń oshaǵy joq. Al Alǵa, Áıteke bı, Yrǵyz, Oıyl aýdandarynda týlıaremııanyń tabıǵı oshaǵy bar. Bul 38 eldi meken aýmaǵy.

— Jyl saıyn asa qaýipti ınfektsııany epızootııalyq baqylaý maqsatynda kene jınap, zertteledi. Bıyl sáýirden bastap Ulttyq saraptama ortalyǵynyń oblystyq fılıaly 35 eldi mekende dezınsektsııa jáne deratızatsııa jumysyn bastady. Osy jyly oblysta 52 adamdy kene shaǵyp, medıtsınalyq kómekke júgindi. Belsendi ýaqyty — kóktem, jaz aılary. Ózen jaǵasy, toǵaı, saıajaılarda tirshilik etedi. Sondyqtan tabıǵat aıasyna shyqqanda, mal jaıǵanda óte saq bolý kerek, — dedi Aqtóbe oblystyq sanıtarııalyq-epıdemıologııalyq baqylaý departamenti bóliminiń bas mamany Murat Mýafıh.

Aıta keteıik, kene shaqqan adam 21 kún dáriger baqylaýynda bolýy kerek. Bul aýrýdyń aldyn alýǵa kómektesedi.

Eske salsaq, Petropavlda kene men masaǵa qarsy dárileý jumystary bastaldy. Soltústik Qazaqstan oblysynda sáýir aıynda kene shaqqan 138 adam dárigerge kóringen.