Aqtóbede 5 jyl aýystyrylmaǵan basseın sýy talapqa saı bolyp shyqty

AQTÓBE. QazAqparat – Aqtóbedegi «Dostyq» sport mektebinde ata-analar shaǵymynan keıin 5 jyldan beri aýystyrylmaǵan basseın sýynan synama alyndy. Onyń qorytyndysymen densaýlyqqa zııandy zattar tabylmady, dep habarlaıdy QazAqparat tilshisi.

«Dostyq» balalar-jasóspirimder sport mektebindegi basseın qala boıynsha eń úlken keshen sanalady. Mundaǵy ata-analar jattyǵýǵa baratyn balalarynyń denesi bórtip, jótele bastaǵanyn aıtqan edi. Keıin sýdan synama alyndy.

«Sanıtarlyq zerthana bar. Shaqyryp, sý synamasy berildi. Qorytyndysy boıynsha – bári talapqa saı», - dedi «Dostyq» sý sporty túrleri boıynsha oblystyq balalar-jasóspirimder sport mektebiniń dırektory Serikbol Nuralın.

Onyń aıtýynsha, 5 jyldan beri sýdyń tolyq tógilip, jańartylmaý - sanıtarııa talaptaryn buzý bolyp tabylmaıdy.

«Sýdy tógip, qaıta quıýdyń óz tártibi bar. Basseın sýy kógerip, reagentterdiń áseri bolmaı qalǵan kezde aýystyramyz. Sonymen birge jóndeý jumystary kezinde sý tógiledi. Sońǵy ret jóndeý 2017 jyly boldy. Sol kezde tógilip, qaıta quıyldy. Al kelesi jóndeý jumysyn 2023 jylǵa josparlap otyrmyz. Jalpy basseın sýy kúndelikti almasyp otyrady. Tógilgeni arnaıy qubyr arqyly fıltrge túsedi. Fıltrde tazalanyp, basseınge qaıta aıdalady. Al fıltr aptasyna eki ret aýystyrylady. Tazartylǵan kezde sý káriz qudyǵyna tógiledi», - dedi Serikbol Nuralın.

Aıta keteıik, keshende barlyǵy 800 bala jattyǵady. Basseın bir kúnde 200 adamdy qabyldaı alady.

«Bizge ata-analardan eshkim habarlasyp, aryz jazǵan joq. Bul mekemede kezekten tys tekserý bolmady», - dedi oblystyq Sanıtarııalyq-epıdemıologııalyq baqylaý departamenti bóliminiń basshysy Laýra Nurjaýova.