Aqtóbede 5 jasar balany qutqarǵan stýdent pen oqýshy marapattaldy
AQTÓBE. QazAqparat – Aqtóbe oblystyq tótenshe jaǵdaılar departamenti 5 jasar balany sýdan alyp shyǵyp, ómirin qutqarǵan Aıbar Serik pen Bımyrza Manasty marapattady, dep habarlaıdy QazAqparat tilshisi.
Búginginiń jas batyrlary alǵys hat aldy. Bul marapat 5 jasar balany sýdan alyp shyǵyp, birine jasandy tynys alý jolymen ómirin saqtap qalǵany úshin berildi. Al №55 orta mektep oqýshysy Bımyrza Manastyń ustazy oqıǵanyń shyn máninde qalaı órbigenin aıtyp berdi.
«Ózen jaǵasynda eki qyzdyń aıǵaılap kómek suraǵanyn Aıbar Serik estigen. Keıin ózen ortasyndaǵy balany kórip, alyp shyqqan. Al Bımyrza Manas teledıdar arqyly kórgenin jasap, balaǵa alǵashqy kómek berdi. Sóıtip sý qusqan kezde ony kóterip, dúken mańyna ákelgen. Meniń keziktirgenim osy kez. «Apaı, sýǵa ketip qalǵan» dep mán-jaıdy aıtty. Balanyń qaltyrap-dirildep jatqanyn kórip, taksımen jetkizýdi jón kórdim. Qarǵaly qalalyq aýrýhanasyna jetkizgen kezde «balalar aýrýhanasyna baryńdar» dep keri qaıtardy. Sóıtip turǵanda bizdiń artymyzdan jetken jedel járdem brıgadasy kómek kórsetý úshin alyp ketti. Keıin oqýshym Bımyrza ekeýmiz oqıǵa ornyna baryp, ata-anasyn izdedik. Ata-ájesi óldige sanap otyr eken. Qýanyshty habardy bizden estidi»,- dedi №55 orta mektep muǵalimi Bıbigúl Saǵıdollaeva.
Ustaz túni boıy dárigerlermen baılanysta bolyp, balanyń jaǵdaıyn sát saıyn bilip otyrǵan.
«Jansaqtaý bóliminiń mamandary maǵan habarlasyp, jaǵdaıyn aıtyp otyrdy. Al ata-ájesi alǵysyn jaýdyrdy. Shynymdy aıtsam, balanyń qaltyrap-dirildep jatqanyn kórgende adamdar ata-anasyn kinálap, telefonǵa túsirip jatty. Al ózim nesıe tóleýge baryp, bar jumysymdy umytyp kettim. Sol túni uıyqtaı almadym», - dedi Bıbigúl Saǵıdollaeva. Eske salsaq,, Aıbar Serik pen Bımyrza Manas Qarǵaly ózenine batyp ketken balany alyp shyǵyp, aman alyp qaldy.
