Aqtóbede 5 myńnan astam otbasy 50 myń teńgeden áleýmettik kómek alady

AQTÓBE. QazAqparat - Aqtóbede 5 myńǵa jýyq muqtaj otbasy 50 000 teńgeden kómek alyp jatyr. Tórtinshi kezeńde aýyl turǵyndary qamtylady, dep habarlaıdy QazAqparat tilshisi.

«Nur Otan» partııasynyń tóraǵasy Nursultan Nazarbaevtyń tapsyrmasyna sáıkes «Birgemiz» qory arqyly muqtaj jandarǵa kómek kórsetýdiń tórtinshi kezeńi bastaldy. Buǵan deıin Aqtóbe qalasynyń 18 451 turǵyny kómek aldy.

Al úshinshi kezeńde respýblıka boıynsha 110 myńdaı otbasyna kómek kórsetilse, oblysymyzdan Alǵa, Qandyaǵash, Jem, Embi, Temir, Shalqar, Hromtaý qalalaryndaǵy 5880 otbasy qoldaýǵa ıe boldy. Onyń ishinde az qamtylǵan kópbalaly otbasylar, múmkindigi shekteýli jandar, múgedek bala tárbıelep otyrǵan otbasylar, jetim balalar bar.

«Telefonyma kelgen habarlamany kórgende kózime jas aldym. Júgirip partııa fılıalyna bardym. Elbasymyzǵa myń alǵys. Árqashan aman bolsyn. Árqashan halqyna kómek kórsetýde», - dep jazdy Facebook paraqshasynda Temir aýdanynyń turǵyny Samal Mameshova.

Al Qarǵaly aýdanynyń turǵyny Madına Tadjıeva múmkindigi shekteýli balalarǵa qordan kómek kórsetilip jatqanyna rızashylyǵyn bildirgen.

Aıta keteıik «Nur Otan» partııasy tóraǵasynyń birinshi orynbasary Baýyrjan Baıbek Instagram-daǵy óz paraqshasynda Elbasynyń tapsyrmasymen kezekti kómektiń asa muqtaj 80 myń otbasyǵa baǵyttalǵanyn atap ótti.

Tuńǵysh Prezıdenttiń úndeýine qoldaý bildirgen aqjúrek metsenattardyń arqasynda qorǵa 28 mıllıardtan astam qarajat jınalǵan.