Aqtóbede 48 mektepte oqýshylar koronavırýs juqtyryp, synyptar karantınge jabyldy

AQTÓBE. QazAqparat – Aqtóbe oblysy boıynsha 75 bala koronavırýs ınfektsııasyna shaldyǵyp, olar bilim alatyn mekteptegi synyptar karantınge jabyldy, dep habarlaıdy QazAqparat tilshisi.

Aqtóbe oblysyndaǵy epıdjaǵdaı áli de turaqsyz. Bir táýlikte óńirde 300 adamnan koronavırýs ınfektsııasy anyqtaldy.

Onyń 238-i vırýstyń sımptomdy túrine shaldyqqan.

«Qazirgi kezde myńnan astam adam ınfektsııalyq aýrýhanalarda jatyr. Onyń 100-i jansaqtaý bóliminde. Infektsııalyq kereýet júktemesi 55, al reanımatsııadaǵy júkteme 45 protsentti qurap otyr», - dedi oblystyq densaýlyq saqtaý basqarmasy basshysynyń orynbasary Aıgúl Kúshtaeva.

Aıta keteıik, jyl basynan beri 489 adam vırýs juqtyryp kóz jumdy. Onyń tórteýi júkti kelinshek.

«Barlyǵy 75 oqýshy koronavırýs ınfektsııasyna shaldyqqan. Olar bilim alǵan 48 mektepte synyptar karantınge jiberildi. Onyń 34-i Aqtóbe qalasynda, ózgesi aýdandarda. Jalpy búginge deıin tirkelgen 29999 naýqastyń 0,8% vırýsty syrttan juqtyryp ákelingeni belgili boldy. Sonymen birge 12,3% naýqastarmen baılanysta bolǵan, al 86,8% jergilikti jaǵdaı. ​Qazir 10 myńnan astam adam úı karantıninde», - dedi Aqtóbe oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.