Aqtóbede 46 sábı COVID-19 dıagnozymen ómirge kelgen
Aqtóbe oblysy boıynsha bir táýlikte 48 adamnan koronavırýs ınfektsııasy anyqtaldy. Onyń kóbi derttiń sımptomdy túrine shaldyqqan.
«Qazirgi kezde ınfektsııalyq statsıonarlarda 155 adam em qabyldap jatyr. Onyń 16-y jansaqtaý bóliminde. Tynys alýy nasharlaǵan 11 naýqas ókpeni jasandy jeldetý apparatyna qosyldy. Sonymen birge jańa týǵan 9 shaqalaqtan da koronavırýs ınfektsııasy anyqtaldy. Olar derttiń sımptomsyz túrine shaldyqqan. Jalpy jyl basynan beri 46 sábıdiń PTR synamasy oń mán kórsetti»,- dedi Aqtóbe oblystyq densaýlyq saqtaý basqarmasy bóliminiń basshysy Baqytjan Túlkibaeva.
Qazir ınfektsııalyq tósek-oryn júktemesi 42,5%, al jansaqtaý bólisinde 29% qurap otyr. Aqtóbe oblystyq sanıtarııalyq-epıdemıologııalyq baqylaý departamenti basshysynyń mindetin atqarýshy Gúlbaný Dáýletovanyń aıtýynsha, monıtorıng toptar jumysy jalǵasyp jatyr. Jyl basynan beri 92 mıllıon teńge bolatyn 939 aıyppul salyndy.
«Oblysqa barlyǵy 846 myńnan astam vaktsına jetkizildi. Qazir óńir turǵyndarynyń 58,8% vaktsınanyń eki komponenin de qabyldady. Qarasha saıynyń sońynda revaktsınatsııa júrgiziledi. Daıyndyq bar. Sonymen birge balalar men júkti áıelderge vaktsına salatyn medıtsına qyzmetkerleri biliktiligin arttyryp, vaktsınany tasymaldaý, saqtaýǵa arnalǵan arnaıy apparat ázirlenip jatyr»,- dedi Aqtóbe oblystyq densaýlyq saqtaý basqarmasy bóliminiń basshysy Baqytjan Túlkibaeva.