Aqtóbede 43 eldi mekendi sý basý qaýpi bar -TJD

Aqtóbe oblysy aýmaǵynda qardyń túsimi ótken jylmen salystyrǵanda 1,5 ese az. Degenmen, tótenshe jaǵdaılar qyzmeti qaýip seıilmegenin jasyrmady. Sebebi, jerdiń qabaty qatyp qalǵan. Eger qar erise, jerge sińbeı, birden jylǵalarǵa aǵady.

«Qar erigen kezde mindetti túrde onyń júrer jolyn tazartyp, aýyldan shyǵaryp jiberý úshin birlese jumys isteý kerek. Al bizde árkim óz úıi men aýlasyn oılap, qorshap alady. Sol kezde sýdyń ketetin jeri bolmaı, kórshisiniń úıine kirýi múmkin. Qara bastyń qamyn oılamaı, bári birlese jumys istese, aǵyp kelgen sýdyń betin qaıtarýǵa bolady. Qazirgi kezde barlyǵy 43 eldimeken sý basý qaýpi bar. Ol jerlerde 12 myńnan astam adam turady. Aýyl ákimderi halyqty aqparattandyryp jatyr. Keshendi josparǵa 100 tonnadan astam ınertti materıal ázirlenip, 25 myń dana qum toly qap jınaldy. Oblystaǵy kóktemgi sý tasqynyń aldyn alý jumysyna 190 mıllıon teńge bólindi. Rezervte 1,6 mıllıard teńge bar»,- dedi Aqtóbe oblystyq tótenshe jaǵdaılar departamenti bastyǵynyń mindetin atqarýshy Qaırat Qasym.
 

Sonymen qatar, 14 táýlikke jetetin azyq-túlik, sý men janar jaǵarmaı ázirlendi. Jergilikti atqarýshy bılik evakýatsııalanatyn turǵyndardy ornalastyrý úshin 87 oryn belgiledi.

Aıta keteıik, oblys boıynsha 170 tekshe metr qar syrtqa shyǵaryldy. Bul ótken jyldan 2,5 ese az. Oblys boıynsha kóktemgi sý tasqyny kezinde 1600 adam qutqarý jumystaryna daıyn. Barlyǵy 500 tehnıka ázirlendi. Onyń teń jartysyna jýyǵy sý sorǵylaý mashınalary. Eger tótenshe jaǵdaı jarııalansa, ózge óńirlerden 220 adam, 35 tehnıka keledi.

Aqtóbe oblysy boıynsha Qarǵaly, Áıteke bı, Alǵa, Hromtaý, Muǵaljar aýdandary men Aqtóbe qalasynda qaýip basym.

Eske salsaq, ótken jyly sáýir aıynyń orta tusynda Qarǵaly, Elek, Sazdy ózenderi tasyp, birneshe sý qoımasy ashyldy. Saldarynan júzdegen adam mektepterge ornalastyryldy. 

Glavnoe foto: ıllıýstratıvnoe foto s youtube.com