Aqtóbede 424 myń gektar alqapta shegirtkege qarsy óńdeý jumystary júrgizilip jatyr

Óńirge jumys sapary barysynda Aýyl sharýashylyǵy vıtse-mınıstri Ermek Kenjehanuly «Fıtosanıtarııa» RMK oblystyq karantındik zerthanasynyń qyzmetimen, PTR-zerthananyń jumysymen jáne óndiristik jumystardyń uıymdastyrylýymen tanysty. Dıagnostıkalaý úderisiniń jedeldigi, júrgiziletin zertteýlerdiń sapasy jáne mekemeniń materıaldyq-tehnıkalyq bazasyn nyǵaıtý máselelerine erekshe nazar aýdaryldy.

Sondaı-aq Ermek Kenjehanuly shegirtke zııankesterine qarsy júrgizilip jatqan kúres sharalarynyń barysyn tekserdi.

Aýmaqtyq ınspektsııa, Fıtosanıtarııalyq dıagnostıka jáne boljamdar jónindegi respýblıkalyq ádistemelik ortalyq, sondaı-aq hımııalyq óńdeý jumystaryn júzege asyratyn uıymdar ókilderiniń qatysýymen ótken kóshpeli jumys keńesinde fıtosanıtarııalyq ahýal, shegirtkelerdiń taralýyna júrgizilgen monıtorıng nátıjeleri, mekemeler arasyndaǵy ózara is-qımyl jáne zııankester oshaqtaryna jedel áreket etý máseleleri qaraldy.

Keńes qorytyndysy boıynsha aldyn alý sharalaryn kúsheıtý, qoldanylatyn preparattar men óńdeý tehnologııalarynyń tıimdiligin arttyrý qajettigi atap ótildi. Sondaı-aq fıtosanıtarııalyq jaǵdaıdyń ózgerýine jedel áreket etý, shegirtke zııankesteriniń oshaqtaryn der kezinde anyqtaý, júrgiziletin óńdeý jumystarynyń sapasy men qoldanylatyn preparattardyń tıimdiligine baqylaýdy kúsheıtý jáne zııankesterdiń odan ári taralýyna jol bermeý jóninde tapsyrmalar berildi.

Aıta keteıik, 2026 jyly Aqtóbe oblysynda shegirtke zııankesterine qarsy kúres sharalaryn 424 myń gektar alqapta júrgizý josparlanǵan. Búgingi kúni 283 myń gektar jer óńdelip, jospardyń 66,7%-y oryndaldy. Jumystar bekitilgen kestege sáıkes jalǵasady.

Buǵan deıin Atyraýda 28,7 myń gektar jer shegirtkege qarsy óńdelgenin jazdyq.