Aqtóbede 41,9 mlrd teńgege alkogolsiz sýsyndar shyǵaratyn zaýyt salynady
ASTANA. KAZINFORM — Jobany júzege asyrý óńirde 120-dan astam jańa jumys ornyn qurýǵa múmkindik beredi. Bul týraly Úkimettiń baspasóz qyzmeti habarlady.
Prezıdenttiń óńdeý ónerkásibin damytý jáne ınvestıtsııalar tartý jónindegi tapsyrmalaryn júzege asyrý sheńberinde Úkimet Aqtóbe oblysynda alkogolsiz sýsyndar shyǵaratyn zaýyt salý týraly kelisimniń jobasyn maquldady.
Tıisti qaýlyǵa QR Premer-mınıstri Oljas Bektenov qol qoıdy. Jobanyń ınvestory — «Koka-Kola Almaty Bottlers» BK JShS.
— Jańa óndiristik keshenge salynǵan ınvestıtsııalardyń jalpy kólemi 41,9 mlrd teńgeni, jobalyq qýattylyǵy jylyna 280 mln lıtr ónimdi quraıdy. Kásiporyn halyqaralyq standarttarǵa sáıkes keletin qaldyqtardy basqarýdyń ekologııalyq taza júıeleri bar ozyq tehnologııalarmen jabdyqtalmaq. Bul zaýyttyń elimizdiń turaqty ónerkásiptik ekojúıesine ıntegratsııalanýyn qamtamasyz etedi, — delingen habarlamada.
Jobany júzege asyrý óńirde 120-dan astam jańa jumys ornyn qurýǵa múmkindik beredi. Zaýyttyń qurylysy 2026 jyly bastalady.
Budan buryn Astanada qoqys jaǵatyn zaýyt salynatynyn jazǵanbyz.