Aqtóbede 40 myń dollar para bermek boldy dep aıyptalǵan prokýror aqshanyń qaıda ekenin surady
AQTÓBE. QazAqparat - Aqtóbe qalalyq sotynda aıyptalýshy Esentur Qadyrovqa qatysty is qaralyp jatyr. Búgin sot otyrysy kezinde 40 myń dollardy tárkilep, aqshadan saýsaq izderin alý beınematerıaly qaraldy, dep habarlaıdy QazAqparat tilshisi.
Aqtóbe qalalyq sotynda Qylmystyq kodekstiń «Para berý» baby boıynsha sottalýshy Esentur Qadyrovtyń isi qaralyp jatyr. Buǵan deıin habarlaǵanymyzdaı, aldyn ala sot tyńdaýy kezinde sottalýshy E.Qadyrov taǵylǵan aıypty moıyndamaı, tergeýdiń zańsyz ótkenin málimdegen bolatyn.
Búgin sot otyrysy jalǵasyp, Esentur Qadyrovtyń kóligin tintip, para berýge arnalǵan 40 myń dollar aqshany tárkilep, saýsaq izin alý beınematerıaly kórsetildi. Beınematerıal 2018 jyldyń 13 qarashasy kúni túsirilgen. Kólik ishinen eki paket tabylyp, krımınalıster ony saraptaý úshin ǵımarat ishine alyp kiredi. Sol jerde paket syrtynan saýsaq izi anyqtaldy. Eki iz de «para bermek boldy» dep habar bergen prokýror Aıbol Tólegenovke tıesili bolyp shyqty. Al aqshany tárkilep, sanaý jumysy kezinde beınekameranyń batareıasy taýsylyp qalǵan.
«Jalǵan, shyn aqsha ekenin anyqtaıtyn beınematerıal joq. Aqshany alǵan soń ony qaptap, tirkeýge almady. Aqshanyń qaıda ekeni de belgisiz? Qaıda dep suraǵanymyzda arnaıy prokýrorǵa habarlasyńyz dep jaýap berdi. Beınejazba kezinde bir paket ortaǵa qoıylyp, onyń syrtynan saýsaq izi alyndy. Al ol kezde ekinshi pakettegi aqsha nazardan tys qaldy. Tipti kólik ishindegi aqshanyń qaıda jatqany kórsetilip, ózge zattardy izdeý, tintý júrgizilmedi»,- dedi sottalýshy Esentur Qadyrov.
Aıta keteıik, sot otyrysy kezinde sottalýshynyń qorǵaýshylary psıhologııa-fılologııalyq, stenografııalyq saraptama jasatyp, iske qosýdy surady. Sýdıa Erbol Ábdihalyqov ótinish hatty qabyldady. Sebebi, zańǵa engizilgen ózgertýler men tolyqtyrýlardan soń aıyptalýshy tarap jeke sot sarapshylaryna júginip, resmı qorytyndy ala alady.
Sot otyrysy kezinde sottalýshy Esentur Qadyrovtyń qorǵaýshylary 40 myń dollardy ata-anasynan almaǵany, kásipker ata-anasy sol ýaqytta qarjyny Qytaıǵa aýdarǵany týraly qujattardy qylmystyq iske tirkeýdi surady. Biraq sýdıa Erbol Ábdihalyqov qujatty iske tirkemedi.
Buǵan deıin habarlaǵanymyzdaı, prokýror Esentur Qadyrov jumysyna salǵyrt qaraǵany úshin kúdikke iligip, osy isti toqtatýǵa para bermek boldy dep aıyptaldy. Negizi sot otyrysy aıaqtalýǵa jaqyn. Qazirgi kezde memlekettik aıyptaýshy sottalýshy Esentur Qadyrovtyń ótinish hatymen tanysyp jatyr.
