Aqtóbede 4 jasar balanyń ólimine qatysty istiń negizgi sot otyrysy belgilendi

AQTÓBE. QazAqparat – Aqtóbede 4 jasar Danıl Ahýnovtyń óliminen soń onyń ákesi Artýr Ahýnovqa qylmystyq aıyp taǵyldy. Negizgi sot otyrysy 17 shilde kúni ótedi, dep habarlaıdy QazAqparat tilshisi.

Oqıǵa byltyr jeltoqsan aıynda boldy. Marqum Danıl Ahýnovtyń ákesi balasynyń joǵalyp ketkenin aıtyp, polıtsııaǵa habar berdi. Ony izdeýge polıtsııamen qatar eriktiler jumyldyryldy. Ulttyq ulannyń áskerı qyzmetshileri de izdeý jumystaryna qatysty.

Al arada eki kún ótkende oblystyq PD baspasóz qyzmeti balanyń denesi tabylǵanyn, onda zorlyq belgileri bar ekenin habarlady. Sol kúni Qylmystyq kodekstiń «Kisi ólimi» baby boıynsha is qozǵaldy.

Sol kúni eriktiler mán-jaıdy aıtyp, olar biraz ýaqyt tárbıelengen balalar úıiniń aldynda qoshtasý buryshyn jasady. Derekterge súıensek, Maksım, Danıl, Mılana biraz ýaqyt sábıler úıinde tárbıelengen. Keıin olardy óz týǵan ákesi alyp ketken. Al eriktiler tobynyń jetekshisi Ekaterına Golotınanyń aıtýynsha, olar bul otbasyna únemi kómektesip júrgen. Bala joǵalǵanda da izdeý jumystaryn polıtsııamen qatar júrgizdi.

«Іs sotqa 30 maýsym kúni tústi. Al negizgi sot otyrysy 17 shildege belgilenip otyr»,- dep habarlady oblystyq sottyń baspasóz qyzmeti.