Aqtóbede 4 munaı kompanııasyn shyǵynǵa batyrǵan broker sottaldy
AQTÓBE. QazAqparat - Aqtóbe qalalyq sotynyń sheshimimen sottalǵan broker 4 munaı kompanııasyna 19 mln teńgeniń shyǵynyn keltirgen, dep habarlaıdy QazAqparat tilshisi.
«Aqtóbe kólik prokýratýrasy Qazaqstan Respýblıkasyna ákelingen taýarlardyń kedendik rásimdeý qujattarynyń zańdylyǵyna taldaý júrgizdi. Tekserý jumystarynyń nátıjesinde Eýrazııalyq ekonomıkalyq odaqtyń tehnıkalyq reglament talaptaryna sáıkestigine qatysty munaı qurylǵylary boıynsha 350-den astam jalǵan deklaratsııa anyqtaldy», - delingen Bas kólik prokýratýrasynyń baspasóz qyzmeti taratqan aqparatta.
Sotqa deıingi tergeý amaldary barysynda jalǵan qujattardyń ázirlenýine «KB Partnership» JShS brokeri I.E.Begimovtyń qatysy bary anyqtalǵan.
«Onyń zańǵa qaıshy áreketteri saldanynan 4 munaı kompanııasyna 19 mln teńgeniń shyǵyny keltirildi. Aqtóbe qalalyq sotynyń úkimimen kináli azamat iri kólemde alaıaqtyq jasaǵany úshin (QR QK 190-baby, 4-bóligi) 5 jylǵa shartty túrde sottaldy. Shyǵyn tolyq kólemde óteldi. Sot sheshimi kúshine endi», - delingen habarlamada.
Onymen bir mezgilde, prokýratýranyń qadaǵalaý aktisi boıynsha «Embi» keden beketiniń eki laýazymdy tulǵasyna qyzmetine tolyq saı kelmeıtindigi týraly eskertý túrindegi tártiptik jaýapkershilikke tartyldy.
