Aqtóbede 4 qyzyn ózi asyrap otyrǵan oralman áke Qazaqstan azamattyǵyn aldy
AQTÓBE. QazAqparat - Aqtóbege 6 jyl buryn kelgen Mahmýd Kúljumyrov Qazaqstan azamattyǵyn aldy. Endi ol ózine jeke káýlik, balalaryna járdemaqy rásimdeı alady, dep habarlaıdy QazAqparat tilshisi.
Aqtóbe qalasyndaǵy saıajaılardyń birinde bir bólmeni jalǵa alyp otyrǵan Mahmýd Kúljumyrov pen onyń 4 qyzy týraly buǵan deıin jazǵan bolatynbyz . Aqerke, Ásemgúl, Aısulý, Janat esimdi tórt qyz bir-birin baǵady, sabaqtaryn ózderi oqıdy. Oqýshylardyń sabaq úlgerimi jaqsy. Tek analary 2 jyl buryn Ózbekstanǵa ketip, sodan oralmady. Otaǵasy Mahmýd Kúljumyrov ýaqytsha jumyssyz otyr.
Aıta keteıik, Kúljumyrovtarǵa jergilikti ákimdik kómektesti. Al Elek polıtsııa bólimi oralmannyń qujattaryn jınap, onyń Qazaqstandaǵy Ózbekstan elshiligine jiberdi. Qazaqstan men Ózbekstan ortasynda júrip, nemerelerin baǵyp otyrǵan Tilláhan Yrzabaeva óz qýanyshymen bólisti.
«Ulym Mahmýd Kúljumyrovtyń qujattary keldi. Ol Qazaqstan azamattyǵyn aldy. Endi tólqujat jasatyp, balalarǵa járdemaqy alǵymyz keledi. Jer telimi kezegine turýymyz da qajet. Aqtóbelikter kómektesti, sol úshin alǵys aıtamyz»,- dedi Tilláhan Yrzabaeva.
