Aqtóbede 4 birdeı mas júrgizýshi ustalyp, kóligi aıyp turaǵyna qoıyldy
AQTÓBE. QazAqparat - Aqtóbede «Joldaǵy quqyqtyq tártip» jospardan tys jedel aldyn alý sharasy ótip jatyr. Kólikti mas kúıinde aıdaǵan 4 adam qamaldy, dep habarlaıdy QazAqparat tilshisi.
Qoǵamdyq tártipti saqtaý, qylmysty boldyrmaý, jolyn kesý maqsatynda respýblıkalyq jáne halyqaralyq mańyzy bar tasjoldarda «Joldaǵy quqyqtyq tártip» jospardan tys jedel-aldyn alý sharasy ótkizildi.
Barlyq baǵyttaǵy avtojoldarǵa patrýldik, krımınaldyq polıtsııa jáne kınologııa qyzmetkerlerinen turatyn mobıldi toptar qoıyldy.
Atalǵan toptar jol qozǵalysyn qadaǵalaýdan basqa respýblıkalyq jáne halyqaralyq mańyzy bar tasjoldarda, jaqyn ornalasqan eldi mekender men sharýa qojalyqtarynda quqyq buzýshylyqtardyń jolyn kesýge baǵyttalǵan jumys júrgizdi.
Polıtsııa qyzmetkerleri júrgizýshilerge alys jolda demalýǵa bolatyn oryndar jáne qaýipti aýmaqtar kórsetilgen aqparattyq paraqsha taratty.
Polıtseıler tasjoldardyń ár baǵytynda ıesiz jaıylyp júrgen 54 bas maldy aıdap, arnaıy qoraǵa qamady.
Iesiz qalǵan mal eń aldymen túngi ýaqytta qaýip tóndiredi. Kenetten jolǵa shyǵyp, jol-kólik oqıǵasyn týdyrady.
Sonymen qatar, 116 ákimshilik quqyq buzýshylyq anyqtaldy.
Onyń ishinde ań aýlaý, aýyl sharýashylyǵy janýarlaryn jaıý erejelerin buzý, qarýdy saqtaý erejelerin buzý deregi bar.
«Tirkeýsiz júrgen 36 sheteldik anyqtaldy jáne 5 sheteldik kóshi-qon salasyndaǵy zańnamany buzdy. Birinshi kúni 233 avtokólik tekserildi. Aýdandyq polıtsııa bólimderiniń aýmaǵyna tıisti qujattary joq 4 avtokólik jetkizildi. Sonymen qatar, 27 júrgizýshi belgilengen qozǵalys jyldamdyǵyn asyryp, 4 mas júrgizýshi anyqtaldy. Mundaı jumystar júıeli negizde júrgiziledi. Bul - birinshi kezekte azamattardy quqyqtyq tárbıeleý jáne quqyq buzýshylyqtyń aldyn alý»,- deıdi oblystyq PD bastyǵynyń birinshi orynbasary Qanat Álıev.
