Aqtóbede 4 basqarýshy kompanııanyń basshylary jumystarynan bosatyldy
AQTÓBE. QazAqparat - Aqtóbede qalany abattandyrý boıynsha óz mindetterin oryndaı almaǵan 4 basqarýshy kompanııanyń basshylary qyzmetterinen bosatyldy, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Oblys ákimdiginde ótken jınalysta abattandyrý jáne damytý boıynsha jumys toptarynyń qyzmetteri qaraldy. Osydan bir aı buryn óńir basshysy Berdibek Saparbaevtyń tapsyrmasymen Aqtóbedegi qoqysty jınaý, abattandyrý jáne qurylys boıynsha túıitkilderdi sheshý úshin úsh jumys toby quryldy. Olarǵa oblys ákiminiń orynbasary jaýapty tulǵa retinde bekitildi.
Abattandyrý boıynsha jumys tobynyń basshysy Mavr Abdýllın málimdegendeı, ótken aıda mindetterin oryndaı almaǵan 4 basqarýshy kompanııanyń basshylary qyzmetterinen bosady.
M. Abdýllın Aqtóbede 30 myń sharshy metr jaıaýjol plıtkalary tóselgenin, 5 fontannyń jóndelip, qoqys polıgony aýmaǵynyń tolyqtaı qorshalǵanyn atap ótti. Aqtóbe qalasyndaǵy ortalyq bazar men oǵan irgeles aýmaqtardaǵy sanıtarlyq normalardyń buzylýyn joıýda aýqymdy jumystar atqaryldy.
Oblys ákimi jumys toptarynyń qyzmetin maquldap, tártipke keltirý boıynsha jumysty kúsheıtýdi tapsyrdy.
«Barlyq baqylaýshy organdar jumysty kúsheıtýleri tıis. Bul sondaı-aq, jergilikti polıtsııa qyzmetine de qatysty. Basqarýshy kompanııalar ózderiniń rezervterin iske qosyp, tıimdilikterin dáleldeıtin ýaqyt jetti», - dep atap kórsetti óńir basshysy.
Oblys ákiminiń orynbasary Serik Tólenbergenov basqaratyn jumys tobyna áleýmettik nysandar qurylysynyń, kúrdeli jóndeý jumystarynyń sapasy men merziminiń saqtalýyn qatań baqylaý júkteldi. Bıyl oblysta kem degende 870 myń sharshy metr turǵyn úı nemese 8000 jańa páterdi paıdalanýǵa berý josparlanyp otyr.
Keńesti qorytyndylaǵan oblys ákimi Aqtóbe qalasy ákimdiginen, quzyrly memlekettik organdardan, sonymen qatar kommýnaldyq kásiporyndardan qala turǵyndarynyń qazirgi mańyzdy máselelerin, sonyń ishinde qoǵamdyq kólikke qatysty jumystardy jedel sheshýdi talap etti.
