Aqtóbede 4-5 jasar úsh bala sýǵa batyp ketti
AQTÓBE. QazAqparat - Yrǵyz ózenine úsh bala sýǵa batyp ketti. Qaıǵyly oqıǵa Yrǵyz aýdany Aqshı aýylynda boldy, dep habarlaıdy QazAqparat tilshisi.
Aqtóbe oblystyq TJD kezekshi bólimine saǵat 19:00-de habarlama tústi. Aqshı aýylynan bir shaqyrym qashyqta jatqan Yrǵyz ózenine úsh balanyń sýǵa batyp ketkeni belgili boldy. Aqtóbe oblystyq TJD baspasóz qyzmetiniń habarlaýynsha, 2017 jáne 2018 jyldary týǵan úsh bala úlkenderdiń nazarynan tys qalǵan. 4 jáne 5 jastaǵy qyz bala bir otbasynan bolsa, 4 jasar ul ekinshi otbasynyń balasy.
Eske salsaq, bıyl Aqtóbe ózenderindegi qaýipti 220 orynǵa arnaıy belgi ornatylady. Qutqarý jasaǵy bazasynda 88 qutqarýshy erikti oqytyldy. Olarǵa arnaıy sertıfıkat berildi. Olar jaz boıy ózen jaǵasynda qaýipsizdikti qadaǵalaıdy. Sonymen birge jyl saıyn oblystyq dene shynyqtyrý jáne sport basqarmasymen birlesip balalardy júzýge úıretý, qutqarý tásilderine mashyqtandyrý qolǵa alynǵan. Barlyǵy 20 basseınde 1200 bala sýda júzýdi meńgerdi.
Aıta keteıik, byltyr oblysta 5 jáne 6 jastaǵy eki bala sýǵa batyp ketti. Oqıǵa 2021 jyldyń 12-mamyry kúni tirkeldi. Qutqarýshylar jetkenshe sol jerdegi adamdar 2015 jyly týǵan balanyń denesin jaǵaǵa alyp shyqqan. Oqıǵa ornyna jetken súńgýirler 2014 jyly týǵan balanyń denesin jaǵadan 3 metr qashyqtyqtan, 7 metr tereńdikten tapty. Eki bala da sýǵa sheshinip túsken. Sýǵa batyp ketkender bir otbasynyń balalary emes.
