Aqtóbede 35 shetel azamaty el aýmaǵynan shyǵaryldy
AQTÓBE. QazAqparat – Aqtóbede «Mıgrant» jedel-aldyn alý sharasy kezinde 35 shetel azamaty el aýmaǵynan shyǵaryldy, dep habarlaıdy QazAqparat tilshisi.
Naýryz aıynyń 10-17 aralyǵynda «Mıgrant» jedel-aldyn alý is-sharasy ótkizildi. Jumys berýshiler, sheteldik jumys kúshin tartatyn jáne paıdalanatyn jumystarǵa (qyzmetterge) tapsyrys berýshilerdi, sondaı-aq QR azamattar, olarǵa jatyn oryn usynatyn uıymdardyń qyzmetkerleri tekserildi. Bárine Kóshi-qon zańnamasynyń talaptary túsindirildi.
«Qazaqstanda bolý erejesin buzǵan 800-den astam adam, onyń ishinde shetel jáne Qazaqstan Respýblıkasynyń azamattary ákimshilik jaýapqa tartyldy. 35 shetel azamaty sottyń qaýlysymen el aýmaǵynan shyǵaryldy. Al 7 sheteldik elden májbirleý tártibimen ketti. Eń basty qatelik – jumysshylarda tirkelý jáne eńbek qyzmetimen aınalysý ruqsaty bolmady. Ony jumys berýshiler qamtamasyz etýi kerek. Bul quqyq buzýshylyqtary úshin olar ákimshilik jaýapqa tartylady. Ádettegideı sheteldik azamattardyń tólqujattary sotqa usynyldy», - dedi PD Kóshi-qon qyzmeti basqarmasynyń bastyǵy Elmıra Boltaeva.
