Aqtóbede 3,5 mlrd teńgelik zańsyz krıptoaınalym áshkere boldy

ASTANA. KAZINFORM – Qarjylyq monıtorıng agenttigi Aqtóbe oblysy boıynsha departamenti prokýratýranyń úılestirýimen tsıfrlyq aktıvter aınalymy salasynda zańsyz kásipkerlik qyzmetti júzege asyrǵan, sondaı-aq qylmystyq kiristerdi zańdastyrǵan uıymdasqan qylmystyq top qurý jáne oǵan basshylyq etý faktisi boıynsha tergeý júrgizýde.

Vedomstvo málimetinshe, uıymdastyrýshy mindetti tirkeýsiz jáne lıtsenzııasyz qamtamasyz etilmegen tsıfrlyq aktıvtermen operatsııalardan tabys tabý shemasyn uıymdastyrǵan.

Shemany iske asyrý úshin rólderi naqty bólingen, ıerarhııasy bar turaqty top qurylǵan. Qatysýshylar dropperlerdi izdeýmen, olardyń atyna bank kartalary men krıptovalıýta bırjalarynda akkaýnttar rásimdeýmen, qarjylyq operatsııalar júrgizýmen jáne keıin qarajatty qolma-qol aqshaǵa aınaldyrýmen aınalysqan.

- Tergeý derekterine sáıkes, 150-den astam dropperdiń bank kartalaryna túsken qarajat ATAIX bırjasyndaǵy krıptoámııandarǵa aýdarylǵan. Qarajattyń zańdy kórinisin jasaý úshin dropperler men baılanysy bar JShS arasynda jalǵan qaryz sharttary rásimdelgen. Odan keıin qarajat krıptovalıýtaǵa aıyrbastalyp, OKX bırjasyndaǵy krıptoámııandarǵa jiberilgen.

Qarajatty aıyrbastaý jáne shyǵarý úshin baqylaýdaǵy aıyrbastaý pýnkti paıdalanylyp, aqsha shetel valıýtasyna konvertatsııalanǵan, - dep túsindirdi agenttikten.

Nátıjesinde tsıfrlyq aktıvterdi ótkizý boıynsha operatsııalar somasy 3,5 mlrd teńgeden asqan.

Tintý barysynda 46 uıaly telefon, 92 bank kartasy, sondaı-aq 25 463 USDT kólemindegi krıptoaktıvter tárkilendi.

Qazirgi ýaqytta bes kúdikti qamaýǵa alyndy. Tergeý jalǵasýda. Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.

Aıta keteıik, Antalıada polıtsııa keıpine engen qaskóıler 4 mln dollarlyq krıptoaktıvti urlady.