Aqtóbede 35 mln teńge jymqyrǵan mekeme basshysy sottaldy
ASTANA. KAZINFORM - «Aqtóbe qalasynyń jol qozǵalysy jáne tsıfrlyq tehnologııalar qaýipsizdigin qamtamasyz etý ortalyǵy» KMM dırektory sottaldy.
Bul týraly QR Sybaılas jemqorlyqqa qarsy is-qımyl agenttiginiń baspasóz qyzmeti málim etti.
Baspasóz qyzmetiniń málimetterine qaraǵanda, Aqtóbe qalasynyń №2 soty «Aqtóbe qalasynyń jol qozǵalysy jáne tsıfrlyq tehnologııalar qaýipsizdigin qamtamasyz etý ortalyǵy» KMM dırektory A. Tilmaǵambetovke qatysty úkim shyǵardy.
Ol jeke kásipker A. Kýsýmovpen kelise otyryp, jalǵan memlekettik satyp alý shartyn jasasý jáne jol belgilerin qoıý boıynsha kórineý oryndalmaǵan jumystar úshin aqy tóleý arqyly 35 mln teńge ıemdengeni anyqtaldy.
Bul rette, zańnama talaptaryn buza otyryp, jumystardy satyp alý bir kózden alý tásilimen júzege asyrylǵan.
Budan basqa, Tilmaǵambetov merdiger uıymdarmen ózderiniń kepildik mindettemeleri sheńberinde oryndalýy tıis jol tańbalaryn salý jónindegi jumystardy memlekettik satyp alý sharttaryn jasasý arqyly 237 mln teńge mólsherinde bıýdjet qarajatyn jumsaǵan.
Sot sheshimimen Tilmaǵambetovke 8 jylǵa bas bostandyǵynan aıyrý jazasy taǵaıyndaldy, sondaı-aq ómir boıy memlekettik qyzmette, sýdıada jáne jergilikti ózin-ózi basqarý organdarynda qyzmet etý quqyǵynan aıyryldy.
Sol úkimmen onyń sybaılasy Kýsýmov kommertsııalyq jáne memlekettik uıymdarda materıaldyq jaýapty laýazymdardy atqarý quqyǵynan ómir boıyna aıyra otyryp, 7 jylǵa bas bostandyǵynan aıyryldy.
Sot aktisi zańdy kúshine engen joq.
Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.
- Memleket basshysynyń tapsyrmasyn oryndaý maqsatynda Sybaılas jemqorlyqqa qarsy is-qımyl agenttigi qoǵamdaǵy zańdylyq pen tártip qaǵıdatyn qamtamasyz etýge erekshe nazar aýdarady, - delingen habarlamada.
Osyǵan deıin Antıkor Qazaqstannyń týrızm salasyndaǵy sybaılas jemqorlyqty tekseretini týraly jazdyq.