Aqtóbede 35 myń oryndyq stadıondy kim salady

AQTÓBE. KAZINFORM – Eki jylda qurylysty aıaqtaý josparlanyp otyr. Taıaýda ákimdik qurylysty birige júrgizetin ınvestordyń kim bolatynyn habarlaıdy.

Aqtóbedegi 35 myń oryndyq stadıon qurylysyn ınvestorlar salady degen jospar boldy. Keıin onyń quny ádettegiden qymbatqa túsetini anyqtalyp, birlesken jobaǵa aýystyryldy.

- Memlekettik-jekemenshik seriktestik aıasynda salýdy josparlap, ınvestor anyqtaldy. Keıin joba quny taǵy 40% ósetinin eseptep, bul oıdan bas tarttyq. Demek, 70 mlrd teńgege salý josparda bolsa, olar 120 mlrd teńgege shyǵardy. Tıimsiz bul. Biz sol 70 mlrd teńgege salamyz. Jaqyn arada shetel kompanııasy týraly aıtylady. Kelisim júrgizildi, - dedi Aqtóbe oblysynyń ákimi Ashat Shaharov Kazinform tilshisiniń saýalyna.

Jańa ınvestor retinde birlesken kompanııa tańdaldy. Qarjy ınvestordan da, bıýdjetten de bólinedi. Keıin ınvestor qarjysy birtindep qaıtarylady. Qarjyny qaıtarý ýaqyty 5-7 jylǵa sozylýy múmkin. Qurylysta sapaǵa basa mán beriledi.

- Syıymdylyǵy 35 oryndyq dep bekitildi. Bul týraly da kóp pikir aıtyldy. Aqtóbede bir matchqa 50-55 myń adam bılet alýǵa suranys jasaıdy. Al Eýropa lıgasy oıyndarynda 168 myń adam suranys berdi. Onyń bári eskerildi. Stadıondaǵy jasyl alań tabıǵı bolady. Qurylys kezinde ony jabý, saqtaý joly birden eskeriledi, ıaǵnı qysta alań jabylyp, muz qatpaıdy. Qurylys eki jylǵa sozylady. Úkimetten qoldaý bar, - dedi Ashat Shaharov.

Aıta keteıik, «Aqtóbe» fýtbol klýbynyń aýktsıondaǵy alǵashqy quny belgili boldy. Mamandar klýbty 364, 3 mln teńgege baǵalap berdi.