Aqtóbede 35 myń oryndyq stadıon bıýdjet qarjysy esebinen salynatyn boldy

AQTÓBE. KAZINFORM — Qazirgi kezde jobalyq-smetalyq qujatyn jasaýǵa 200 mln teńge bólindi.

Aqtóbedegi ortalyq stadıon qurylysy Prezıdentke tanystyrylǵan joba. Alǵashqy kezde sheteldik ınvestorlar salady dep josparlanǵanymen, bul ekonomıkalyq jaǵynan tıimsiz degen sheshim qabyldanǵan.

— Alǵashynda memlekettik-jekemenshik áriptestik aıasynda salý modeli qarastyrylǵan bolatyn. Keıin ekonomıkalyq turǵyda tıimsiz dep tanyldy. Qazir salý mehanızmi ózgerdi. Jalpy memleket tarapynan, qosymsha ınvestıtsııa tartý arqyly júzege asyrý josparlandy. Búginde jer telimi anyqtaldy. Bıyl qurylys jumystary bastalady, — dedi Aqtóbe oblystyq dene shynyqtyrý jáne sport basqarmasynyń basshysy Meırambek Mahambetov.

Jobalaý ári qurylys jumystaryna — Aqtóbe oblystyq qurylys, sáýlet jáne qala qurylysy basqarmasy jaýapty.

— Qazirgi kezde jobalyq-smetalyq qujat jasaý úshin kelisimshart jasaldy. Bıylǵa 200 mln teńge bólindi. Qujat daıyn bolǵan soń qurylys bastalyp, 2-3 jylǵa sozylýy múmkin. Qurylys bıýdjet esebinen júredi, — dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.

Eske salsaq, Sport jáne týrızm mınıstrliginiń málemetinshe, respýblıkada 28 negizgi stadıon jumys isteıdi. Bul rette 14 jańa stadıon salý qajet. Jumys istep turǵan 11 stadıon jóndeýdi nemese qaıta jańartýdy talap etedi. 9 stadıon salý úshin qajetti is-sharalar júrgizilip jatyr. Onyń ishinde myna eki nysannyń qurylys jumystary qolǵa alynǵan.