Aqtóbede 35 aýyl ákimin saılaýǵa 107 kandıdat tirkeldi
AQTÓBE. QazAqparat - Aqtóbede 35 aýyl ákimi saılanady. Barlyǵy 107 kandıdat tirkeldi, dep habarlaıdy QazAqparat tilshisi.
«Saılaýǵa ázirlený jáne ótkizý jónindegi negizgi is-sharalar kúntizbelik josparǵa sáıkes aıaqtaldy. Saılaý naýqany bastalǵan kúnnen beri 115 adam ótinish berdi. Onyń jeteýinde qujat durys bolmady, ıaǵnı, talapqa saı kelmeı, ótpedi. Bir úmitker óz ótinishimen kandıdatýrasyn alyp tastady. Búgingi jaǵdaı boıynsha, 107 kandıdat tirkeldi. Onyń 65-i alty saıası partııa ókili bolsa, 42-si ózin-ózi usyndy. Bir okrýgke ortasha eseppen 3 adamnan kelip tur»,- dedi oblystyq saılaý komıssııasynyń tóraıymy Gúlnár Kúnbaeva.
Onyń aıtýynsha, tirkelgen úmitkerlerdiń 17-i, ıaǵnı, 16% áıel. Ortasha jasy - 40 jas. Eń jasy 27-de bolsa, úlkeni 62 jasta. Ereje boıynsha úgit-nasıhat jumystary bastaldy.
