Aqtóbede 34 eldi mekendi sý basý qaýpi bar
Aqtóbe oblysynda kóktemgi sý tasqyny kezeńine daıyndyq júrip jatyr. Jaz-kúz aılarynda aldyn alý jumystary atqarylyp, 4 eldi mekendegi qaýip joıyldy. Sonymen birge 13 eldi mekendegi qaýip seıilgenimen, ózgesi sol kúıi qalyp otyr.
«Sý tasqyny bolýy múmkin aýyldardyń tiziminen shyqqan 4 eldi meken aldaǵy úsh jylda tótenshe jaǵdaılar qyzmetkerleriniń baqylaýynda bolady. Bógetter, qurylymdardyń shydamdylyǵy tekseriledi. Jalpy bıyl daıyndyq kezinde janar-jaǵarmaı, ınertti materıaldar ázirlendi. Bıýdjetten 250 mln teńge qarastyrylǵan. Qajet bolǵan jaǵdaıda 2 mlrd teńge bólý múmkindigi de bar. Bıyl sý tasqyny kezeńine daıyndyq kezinde myńnan astam adam, 400-den astam tehnıka, 78 júzý quraly men 251 motopompa ázirlendi. 14 myńǵa shaqtalǵan 84 ornalastyrý beketi bar», - dedi oblystyq TJD basqarmasynyń bastyǵy Qumar Turmaǵambetov.
Aqtóbe oblysy aýmaǵyndaǵy joldarda tazartylýy tıis 3 myńnan astam sý ótkizý qurylysy, 660 kópir bar. Bárinde jumys naýryz aıynda bastalady.
«Elek, Qarǵaly ózenderiniń sý basseınderi tekserildi. Byltyrmen salystyrǵanda bıyl Elek ózeninde sý 40%, al Qarǵaly ózeninde 15% kóp. Kezekti tekserý 21 aqpan kúni bastalady. Nátıjesi osy aptanyń sońynda belgili bolady. Bıyl oblys boıynsha 13 qar shyǵarý polıgony belgilendi. Turǵyndar aýlalaryndaǵy qardy jınap, kóshege shyǵarýy tıis. Kóshedegi qardy jınaý osy aıda aıaqtalýy kerek», - dedi Qumar Turmaǵambetov.
Aıta keteıik, Aqtóbe sý qoımasynyń jobalyq qýattylyǵy 245 mln tekshe metr bolsa, búginde oǵan 68 mln tekshe metr sý jınalǵan. Qarǵaly sý qoımasynda 32%, Sazdyda 36% sý qory bar.
