Aqtóbede 34 apatty turǵyn úı bar
Aqtóbe qalasynda qazir 34 apatty turǵyn úı bar. Jergilikti ákimdik tek 8 úıdegi adamdardy kóshirýdiń josparyn jasap qoıǵan, dep habarlaıdy Kazinform.
Qala boıynsha apatty dep tanylǵan 34 úıde barlyǵy 372 páter bar. Búginde 8 turǵyn úıdegi máseleniń sheshimi tabylǵan. Sonymen birge taǵy 7 úıge qatysty suraqtardyń jaýaby daıyn.
– Aqtóbe qalasy Chekalın kóshesindegi bes turǵyn úı apatty jaǵdaıda tur. Onda 58 páter bar. Qala ákimdigi men «Stroıstandart-222» JShS arasynda memorandýmǵa qol qoıylyp, Qyzyljar turǵyn alabynan 18 gektar jer berildi. Іrgetasy quıyldy, qurylys materıaldary jetkizildi. Qurylys jumysy 2024 jyldyń ekinshi toqsanynda aıaqtalady dep josparlanyp otyr, - dep habarlady qala ákiminiń baspasóz qyzmeti.
Kazinform osy mekenjaıǵa baryp, turǵyndarmen kezdesip keldi. Mundaǵy adamdar «ákimdiktiń ýáde bergenine bıyl 20 jyldan asty» dep otyr.
Ákimder aýysady, ýáde umytylady – turǵyn
Aqtóbe qalasy Chekalın kóshesindegi bes úıdiń turǵyndary apatty baspanasynyń tirligine beıimdelip ketken. Jyl saıyn, keıde aı saıyn aıta-aıta sharshap, ashýǵa boı aldyrady. Olar «eshkimge kerek emes, aıtpaımyz» dep qolyn bir siltedi. Al keıbiriniń úmiti áli úzilmegen.
– Men osy úıde ómirge keldim. Qazir jasym – 57-de. Úıdi buzý týraly áńgime 1987 jyldan bastap aıtylyp keledi. Sebebi turǵyn úı alǵashynda ýaqytsha baspana retinde áskerılerge berilgen. Al biz jarty ǵasyrdan astam ýaqyt turyp kele jatyrmyz. Shamamen 1963 jyly salynǵan eken. Úı aǵashtan turǵyzylǵan, baspaldaq ta aǵash. Qabyrǵasy ǵana emes, edeni de teńselip tur. Men ekinshi qabattyń turǵynymyn. Úıde júrsem birinshi qabattyń shamy qozǵalady. Óte qorqynyshty. Ákimdiktiń ýáde bergenine 20 jyldan astam ýaqyt boldy. Sońǵy on jylda jıi baryp, jıi aıtyp júrmiz, - deıdi Natalıa Protsenko.
Onyń aıtýynsha, buǵan deıin úıiniń qabyrǵasynyń bir bóligindegi kirpish tolyq qulap qalǵan. Qatty jańbyr kúni tóbeden sý aǵady eken.
20 jyl boıy aıtyp kelemiz – turǵyn
– Men turatyn úıde 8 páter bolsa, onyń teń jartysyn jalǵa berip qoıǵan. Shynyn aıtqanda zeınetkerler men páter jaldaýshylar turady munda. Apatty úıdiń máselesin aıtyp barmaǵan jerimiz qalmady. Ákimdik te, depýtattar da keldi. Bári biledi, kórdi. Bir sheshimi bar dep Qyzyljar turǵyn alabynda salynyp jatqan úıdi kórsetti. Ony úsh jyldan beri kútip júrmiz. Merdiger astanalyq eken. Ákimdikke baryp, shý shyǵarǵan kezde aıtady, keıin bári sol kúıi umytylady, - dedi apatty úıdiń turǵyny Galına.
Ol qurylys basyna baryp, qarap turady. Alǵa jyljıtyn túri kórinbeıdi.
- Jyl saıyn kútemiz. Kúıeýim jete almaı ketti. Ózim 70-temin. Jańa úıdi kórem be, joq pa, bilmeımin. Qartaıǵan shaǵymda men de jaıly ómir súrgim keledi. Bul apatty úı bolsa da ózimiz jóndep, ustap otyrmyz. Jylý joǵarydan tómen qaraı beriledi. Eger sol qubyr jarylsa, biz kúıip qalamyz. Úıdiń qoldanysqa berilgenine 60 jyldan asqanyn eskersek, ne bolaryn oılaýdyń ózi qorqynyshty, - dedi ol.
Jospar bar, qurylys jumysy bastalmady
Tileý batyr kóshesindegi 35 páterli úı qazir qańyrap bos tur. Esik, terezesi buzylǵan, al ishi qoqys alańyna aınalǵan. Qala ákimi baspasóz qyzmetiniń habarlaýynsha, qurylys jumysy 2024 jyldyń tórtinshi toqsanynda aıaqtalady degenimen, áli kúnge deıin aýmaq qorshalmaǵan, qurylys jumystary bastalmaǵan.
Sonymen birge Aqtóbe qalasy Kirpishti kóshesi №10 úıdiń 8 páter ıesine ótemaqy berilip, saıajaı aýmaǵynan jer usynyldy. Al 19 turǵyn úıge qatysty suraqtyń ázirge sheshimi joq.
– Kópshiligi qala ortalyǵynan shalǵaı ornalasqan soń ınvestorlar qyzyqpaıdy. Ázirge 19 turǵyn úı bar osyndaı. Eki túrli jolmen sheshý usynyldy. Birinshiden, 360 páterge shaqtalǵan 9 qabatty úıdiń qurylys jumysy úshin qaıta jobalaýǵa qarjy kerek. Respýblıkalyq bıýdjetten aqsha bólinse, 135 páterdi apatty úıdiń turǵyndaryna berý josparlanyp otyr. Ekinshiden, 1,4 mıllıard teńgege 135 páter satyp alynýy múmkin, - dep habarlady Aqtóbe qalasy ákiminiń baspasóz qyzmeti.
Ázirge eki nusqanyń birin tańdaý, qarjy bólý suraǵy sheshimin tappady.
