Aqtóbede 300-den astam otbasy zańsyz ataýly áleýmettik kómek alǵan
AQTÓBE. QazAqparat - Aqtóbe qalasyndaǵy jumyspen qamtý bólimine jalǵan qujat tapsyryp, ataýly áleýmettik kómek alǵan otbasylar arasynda kásipkerler de bar, dep habarlaıdy QazAqparat tilshisi qala ákiminiń baspasóz qyzmetine silteme jasap.
Aqtóbe qalasynda tabysyn jasyryp, ataýly áleýmettik kómekti alǵan 334 otbasy anyqtaldy. Olar 24 mıllıon teńgeni keri qaıtardy.
«Úıim joq, 6 balam bar, memleketten kómek kerek dep bir áıel aryz jazǵan bolatyn. Kórsetken mekenjaıyna barǵanda derek rastaldy. Sondyqtan oǵan ataýly áleýmettik kómek taǵaıyndaldy. Keıin depýtattar ótkizgen qoǵamdyq qabyldaýda ol baıqaýsyzda 11 yqsham aýdandaǵy úıiniń mekenjaıyn jazǵan. Úı aýlasynda 2 KaMAZ, 1 jeńil kólik, ekiqabatty úı, dúken tur eken», - deıdi qalalyq jumyspen qamtý jáne áleýmettik baǵdarlamalar bóliminiń basshysy Maqpal Turmaǵambetova.
Taǵy bir aqtóbelik eki mekenjaı boıynsha ataýly áleýmettik kómek alyp otyrǵan. Ol Alǵa aýdandyq jáne Aqtóbe qalalyq jumyspen qamtý bólimine qujattar tapsyrǵan. Zańsyzdyq anyqtalyp, otbasy 468 myń teńgeni keri qaıtardy.
«Bir toqsan boıy 70-ke jýyq kásipker tabysyn jasyryp, járdemaqy alyp otyrdy. Barlyǵy óz erikterimen bıýdjet qarjysyn keri qaıtardy», - dedi Maqpal Turmaǵambetova.
