Aqtóbede 30 jasqa deıingi 600 adam qyzylshaǵa qarsy ekpe aldy
AQTÓBE. QazAqparat - Aqtóbe oblysynda qyzylshaǵa qarsy ekpe jasaý jalǵasyp jatyr. Oblystyq qoǵamdyq densaýlyq saqtaý departamenti qosymsha 3,5 myń vaktsınaǵa tapsyrys berilgenin jetkizdi, dep habarlaıdy QazAqparat tilshisi.
Aqtóbe oblysynda qyzylsha derti anyqtalyp, buǵan deıin 7 bala aýrýhanada em qabyldaǵan bolatyn. Qazirgi kúni em qabyldaǵandardyń sany 10-ǵa jetti. Oblystyq qoǵamdyq densaýlyq saqtaý departamenti balabaqsha, mektepterdegi ata-analardyń ortaq chatyna habarlama taratyp, áleýmettik jeli arqyly aqparat berýdi kúsheıtti. Sonymen qatar, múlde ekpe almaǵan ata-analarǵa túsindirý jumysy júrgizilip jatyr.
«Aqtóbe oblysy boıynsha zerthanamen dáleldengen 10 jaǵdaı tirkeldi. Olardyń kóbi - 1 jasqa tolmaǵan balalar. Vaktsınanyń ózi 1 jastan bastalady. Aldyn alý jumystary jan-jaqty júrip jatyr. Aýrý oshaǵy anyqtalyp, tekserildi. Balalar em qabyldap, aýrýhanadan shyqty. Halyq arasynda sanıtarlyq-aǵartý jumystary jalǵasady. Ata-analarǵa da aqparat berildi. Qyzýy kóterilip, balanyń ústi bórtken kezde dereý habar berý kerektigin bári biledi. Negizi sońǵy jaǵdaı 2005 jyly tirkelip, 30 adam em qabyldaǵan edi. Onyń bir emi - vaktsına. Sondyqtan biz buryn vaktsına almaǵan 30 jasqa deıingi adamdardy anyqtap jatyrmyz. Barlyǵy 600-den astam adam ekpe aldy», - dedi oblysdyq qoǵamdyq densaýlyq saqtaý departamenti basshysynyń orynbasary Muhtar Serbaev.
Mamandardyń aıtýynsha, qyzylshaǵa qarsy ekpe jasaý, anyqtaý jumysy 2018 jyldyń qarasha aıynda bastaldy.
«1 jasqa tolmaǵan balalar úshin Aqtóbege 27 myńnan astam vaktsına jetkizildi. Mınıstrlik tapsyrmasy boıynsha vaktsına 9 aıdan bastap egiledi. Taǵy 3,5 myńnan astam vaktsına alynady», - dedi ol.
