Aqtóbede 30 eldi mekendi sý basý qaýpi bar
Aqtóbe oblystyq tótenshe jaǵdaılar departamenti óńirlik kommýnıkatsııalar qyzmetinde kóktemgi sý tasqynyna daıyndyq jumystaryn baıandady. Jol kartasy daıyn. Aqtóbe oblysynda barlyǵy sý basý qaýpi basym 30 eldi meken bar. Onda 11 myńnan astam adam turady.
«Ózen arnasy tasyp, qar tez erigende ǵana qaýip tónýi múmkin. Biraq bıyl úsh iri sý qoımasynda da sý az. Máselen, Aqtóbe sý qoımasy 21, Qarǵaly 13 paıyzǵa ǵana toldy. Sebebi kúzde jańbyr az jaýyp, ylǵaldylyq 28 mm qurady. Qajetti normanyń tek 62 % kórsetti. Sonymen birge toń 77 sm qurap otyr. Keshe ǵana qar jaýdy. Onyń áserin naýryz aıynda naqty aıta alamyz», - dedi Aqtóbe oblysy tótenshe jaǵdaılar departamenti, tótenshe jaǵdaılardyń aldyn alý basqarmasynyń bastyǵy Qumar Turmaǵambetov.
Aıta keteıik, qazirgi kezde 80 tonna janar-jaǵarmaı, 13 myń adamǵa arnalǵan 76 ýaqytsha ornalastyrý beketi ázir. Qutqarý jumystaryn júrgizýge 1500-den astam adam, 467 tehnıka, 73 júzý quraly, 229 motopompa daıyndaldy. Áli kúnge deıin qala men eldi mekenderde qar jınaý jumysy jalǵasyp jatyr. Búginge deıin 154 myń tekshe metr qar shyǵaryldy.