Aqtóbede 3 úshaýysymdy jáne 5 apatty mektep bar
AQTÓBE. KAZINFORM – Jańa oqý jylynda Aqtóbede úsh úshaýysymdy jáne 5 apatty mektep jumys isteıdi. Al sý tasqyny bolǵan aýyl balalarynyń keıbiri sabaqty qashyqtan oqıdy.
2024-2025 oqý jylynda Aqtóbe oblysyndaǵy 433 mektepte 180 myńnan astam bala bilim alady. Onyń 18 myńnan astamy birinshi synypqa barady. Oblysta áli de úsh úshaýysymdy jáne 5 apatty mektep bar.
Úsh aýysymdy mekteptiń bári Aqtóbe qalasynda ornalasqan. Al apatty mektepter Temir, Qobda, Shalqar, Muǵaljar aýdandary men Aqtóbe qalasynda tirkelip tur.
Aqtóbe oblystyq Bilim basqarmasy basshysynyń orynbasary Nurgúl Bertileýovanyń aıtýynsha, sý tasqyny kezinde óńirde 14 bilim berý uıymy zardap shekti. Onyń 6-y balabaqsha, 7-i mektep jáne bireýi ınternat. Barlyǵy 6 bilim berý nysany jańa qurylysty qajet etedi. 8 bilim berý nysanyna jóndeý jumysy júrgizilip jatyr. Búginde tek 1 nysanda jóndeý jumysy aıaqtaldy. Ózgesi jańa oqý jylyna daıyn bolady.
- Jańa bilim berý nysandaryn salý úshin Úkimet rezervinen qarjy bólindi. Yrǵyz aýdany Nura aýylyndaǵy mektepti jeke kásipker óz qarjysy esebinen salyp jatyr. Osy T.Júrgenov atyndaǵy orta mektep oqýshylary qashyqtan oqıdy. Al Oıyl aýdany Ekpetal aýylyndaǵy mektep oqýshylary aýdan ortalyǵyndaǵy kolledj ǵımaratynda bilim alady. Barlyǵy 52 bala,- dedi Nurgúl Bertileýova.
Aqtóbe oblysyndaǵy barlyq memlekettik mektepte beınekamera bar. Bıyl 72 mektepke «Alaqan» biryńǵaı júıesi, 171 mektepke deıingi uıymǵa bıometrııalyq sáıkestendirý júıesi engiziledi.
- Mektepterdi lıtsenzııasy bar kúzet qyzmetiniń qyzmetkerleri kúzetedi. Aqtóbe oblystyq Bilim basqarmasy kúzetshilerdiń jasyna qatysty usynys aıtty. Biraq kompanııanyń ishki jumysyna aralaspaıdy. Jasyna, kásibı biliktiligine qatysty talaptardy birlese sheshý kerek dep esepteımiz,- dedi Nurgúl Bertileýova.
