Aqtóbede 3 aýdan ákimi saılanady: úmitkerler arasynda ózin-ózi usynýshylar kóp

Aqtóbeniń Yrǵyz, Qobda, Oıyl aýdandarynda ákim saılanady. Kandıdattardyń arasynda ózin-ózi usynýshylar basym, dep habarlaıdy Kazinform.

Aqtóbe oblysy boıynsha úsh aýdan ákimin saılaýǵa 136 mıllıon teńge bólindi. Orta eseppen ár aýdanǵa 45 mln teńgeden kelip tur.

Qazirgi kezde tirkeý jumysy aıaqtalyp, úgit-nasıhat júgizilip jatyr. Máselen Yrǵyz aýdanynda 5 kandıdat bar. Olardyń bári memlekettik qyzmetshi. Ál-Farabı Álibekuly, Núrken Jubanazarov, Orynǵalı Qonysbaı, Albek Taýbatyrov ózin-ózi usynsa, buǵan deıin aýdan ákimi bolǵan Nurlan Qyzbergenov «AMANAT» partııasy atynan úmitker. Kandıdattardyń saılaýshylarmen kezdesýine arnalǵan mekenjaılar da anyqtaldy.

Al Qobda aýdanynda ádisker, kommýnalyq mekeme basshysy men aýyl ákimi, orman sharýashylyǵyna jaýapty qyzmetkerler ákim bolýdan úmitti. Baǵdat Amantaev, Asylbek Klıýtov, Baýyrjan Mýsaev, Erkebulan Talaspaev ózin-ózi usynsa, «AMANAT» partııasynan Іzgilik Tynymgereev kandıdat retinde tirkeldi.

Úshinshi aýdan – Oıyl. Munda da 5 úmitker bar. Bolatbek Ádilhanov, Aıbek Sultanov, Aıbat Erbazıev, Arslanbek Aldııar ózin-ózi usynsa, Asqar Qazybaev «AMANAT» partııasynan.

Úmitkerlerdiń eń jasy 29-da bolsa, úlkeni 61 jasta.

Kandıdattar arasynda aýyl ákimderi, bólim basshylary men qarapaıym mamandar bolǵanymen, áıelder joq. Olar 4 qarashaǵa deıin úgit-nasıhat jumysyn júrgize alady.