Aqtóbede 288 shaqyrym joldy jóndeýge 44,7 mlr teńge bólindi

AQTÓBE. KAZINFORM – Aqtóbede bıyl 288 shaqyrym jol jóndeledi. Kóbi qalaaralyq jáne aýylishilik jol. 

Aqtóbe oblysynda jol qurylysy jumysy mamyr aıynda bastalady. Oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyrdyń aıtýynsha, 101 jobany júzege asyrýǵa 44,7 mlrd teńge bólingen. Olardyń ishinde 21-i – jergilikti, qalǵan 80-i – qalaaralyq jáne aýylishilik joldar. 

– Qarjynyń 3,3 mlrd teńgesi oblystyq joldardy damytýǵa bólindi. Olar: Shalqar-Bozoı, Qobda-Oıyl joldaryn ortasha jóndeý, qaladaǵy Ǵ.Jubanova kóshesi men Aqtóbe-Bolgarka-Shubarqudyq joldarynyń sý ótkizgish qubyrlaryn kúrdeli jóndeý. Al, aýdan joldaryn jóndeýge 18,6 mlrd teńge jumsalady. Oǵan aýdandyq 117,2 shaqyrym, aýylishilik 82 shaqyrym jol kiredi. Aqtóbe qalasynda 23 joba iske asyrylady. Oǵan 22,7 mlrd teńge qarjy jumsalady. Nátıjesinde jaqsy jáne qanaǵattanarlyq kúıdegi kórsetkishin 80 paıyzǵa jetkizý kózdelip otyr, - dedi oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyr. 

Aqtóbe oblysy ákiminiń baspasóz qyzmetiniń habarlaýynsha, «Aýyl el – besigi» jobasy aıasynda jalpy somasy 4,7 mlrd teńgege aýdandardaǵy 26 aýylishilik joldy salý jáne jóndeý jobasy júzege asyrylady. Óńirde jalpy jol qurylysy jumystary kezinde bıyl 38,4 myń tonna bıtým, 1,7 mln tonna qıyrshyq tas, 320 tonna qum, 17,3 myń tonna tsement qoldanylady. 

– Jol ınfraqurylymyn damytýǵa qomaqty qarajat bólinip otyr. Joldardy jóndeý men qurylys jumystaryn joǵary sapada júrgizý qajet. Jol jaǵdaıyn baqylaýdy kúsheıtý kerek. Árbir joba ýaqytynda jáne kemshiliktersiz aıaqtalýy tıis, - dedi Aqtóbe oblysynyń ákimi Ashat Shaharov. 

Aıta keteıik, bıyl «Qaraǵandy – Jezqazǵan», «Aqtóbe – Ulǵaısyn» jáne Saryaǵash aınalma jolynyń qurylysy bastalady.