Aqtóbede 26 jastaǵy qyz balkonnan qulap kóz jumdy
Oqıǵa Aqtóbe qalasy aǵaıyndy Jubanovtar kóshesinde boldy. Búgin saǵat 15:30-da Jedel basqarý ortalyǵynyń pýltine kópqabatty úıdiń balkonynan qyzdyń qulaǵany týraly habarlama kelip tústi.
«Polıtsııa qyzmetkerleri 9 qabatty úıdiń 7-qabatynyń balkonynan sekirgen 26 jastaǵy qyzdyń máıitin tapty. Qyz alǵan jaraqattarynan jedel járdem brıgadasy kelgenge deıin qaza boldy. Oqıǵanyń mán-jaıy anyqtalyp jatyr»,- dep habarlady oblystyq PD baspasóz qyzmetiniń jetekshisi Erbolat Sarqulov.
Eske salsaq, Aqtóbede bıyl 168 adam óz-ózine qol saldy. Onyń ishinde 47 adam kóz jumyp, qalǵany qutqaryldy.
Aqtóbe oblystyq prokýratýrasynyń málimetinshe, sýıtsıd jasaıtyndar sany artqan. Byltyr bes aıda 128 derek tirkelse, bıyl 168-ge jetken. Orta eseppen kúnine 2 adam sýıtsıd jasaıdy.
«Aqtóbe qalasynda 143, Muǵaljarda 5, Shalqarda 4, Mártókte 3, Áıteke bı aýdanynda 3 jaǵdaı tirkeldi. Kópqabatty úılerden sekirý kezinde qoǵamda erekshe rezonans týyndaıdy. Bıyl osyndaı 5 jaǵdaı tirkeldi. Sáýir aıyndy úsh áıel kópqabatty úıden sekirdi. Onyń bireýi 25 qabatty «Aqtóbe-Ajary» turǵyn úı kesheninde bolsa, ekinshisi Aqtóbe qalasynyń ortalyǵyndaǵy toǵyz qabatty úıde anyqtaldy. Qazir oblys prokýratýrasy jergilikti atqarýshy organnyń atyna sýıtsıdtiń aldyn alý jóninde sharalar qabyldaý týraly hat joldady», - dep habarlady Aqtóbe oblystyq prokýratýra basqarmasynyń prokýrory Ashat Makaev.
