Aqtóbede 26 jastaǵy jigitti pyshaqtap ketti
AQTÓBE. KAZINFORM — Shalqar aýdandyq polıtsııa bólimi kúdiktini ustap, qamaýǵa aldy. Qazir tergeý júrip jatyr.
Aqtóbe oblysy Shalqar qalasynda qaıǵyly oqıǵa boldy. 9 tamyz kúni 26 jastaǵy jigitti pyshaqtap ketti. Ony aýrýhanaǵa jetkizgenimen, aman alyp qalý múmkin bolmady.
— 2000 jyly týǵan patsıent shabynan pyshaq jaraqatyn alyp jetkizildi. Ol aýrýhanaǵa saǵat 05:51-de tústi. Medıtsına qyzmetkerleri dereý reanımatsııalyq is-sharalardy bastady. Kórsetilgen medıtsınalyq kómekke qaramastan, saǵat 06:21-de bıologııalyq ólim faktisi tirkeldi, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.
Polıtsııa qylmystyq isti tirkep, tergeýdi bastady.
— Atalǵan fakti boıynsha qylmystyq is qozǵaldy. Kúdikti ustalyp, ýaqytsha ustaý ızolıatoryna qamaldy. Tergeý amaldary jalǵasyp jatyr. Tergeý barysy departament basshylyǵynyń baqylaýynda, — dep habarlady Aqtóbe oblystyq polıtsııa departamentiniń baspasóz qyzmeti.
Eske salaıyq, buǵan deıin Shalqar qalasynda jastar arasynda jappaı tóbeles bolyp, bireýi kóz jumdy.
Keıin kóz jumǵan bozbalanyń ákesi tergeýdi ádil ótkizýdi surady.
