Aqtóbede 26 ınvestıtsııalyq joba júzege asyrylyp jatyr
AQTÓBE. QazAqparat – Aqtóbe oblysynda bıyl 26 iri ınvestıtsııalyq joba júzege asyrylyp jatyr. Kásiporyndardyń bir bóligi paıdalanýǵa berildi, dep habarlaıdy QazAqparat tilshisi.
Bıyl Aqtóbe oblysy ekonomıkasyna 410 mlrd teńge ınvestıtsııa tartyldy. Onyń 19,5% sheteldik ınvestıtsııa qurady.
Osy jyly josparlanǵan jobanyń jeteýi iske qosyldy. Oǵan 54,5 mlrd teńge ınvestıtsııa tartylǵan. Olardyń qatarynda «ARM wind» JShS «Badamsha-1» jel elektr stansasy, «Kóktas Aqtóbe» AQ qurylys materıaldary men sılıkat kirpish óndiretin zaýyty, «Alina Holding» JShS qatty-untaq toltyrǵysh shyǵaratyn tsehy, «Milker» JShS qurama jem zaýyty bar.
«Investıtsııa tartý jumysy 2021 jyly da jalǵasady. Sonyń ishinde quny 150 mlrd teńgege 18 joba júzege asyrylmaq. Sóıtip 2 myńnan astam adam jumyspen qamtylady»,- dedi oblys ákimi Ońdasyn Orazalın.
