Aqtóbede 26 adamnyń qyzylshamen aýyrǵany anyqtaldy
AQTÓBE. QazAqparat - Aqtóbe oblysy boıynsha 26 adam qyzylshamen aýyrdy. Naýqastarmen baılanysta bolǵan 390 adamǵa medıtsınalyq baqylaý belgilendi, dep habarlaıdy QazAqparat tilshisi.
Aqtóbe oblysynda qyzylsha juqtyrǵandardyń alǵashqy legi 2018 jyldyń qarasha aıynda tirkeldi.
«2018 jyldyń qarasha aıynan bastap osy jyldyń 13 aqpan aralyǵynda Aqtóbe oblysynda qyzylsha juqtyrǵandardyń 26 jaǵdaıy tirkeldi. Onyń ishinde 14 jasqa deıingi balalar arasynda - 18 jaǵdaı, 1 jasqa deıingi balalar arasynda - 10 jaǵdaı. Aýrý ártúrli sebeppen qyzylshaǵa qarsy ekpe almaǵan balalar arasynda tirkelgen. Aýyrǵan 18 balanyń 6-y densaýlyq jaǵdaıy boıynsha medıtsınalyq qarsy kórsetilimder boıynsha egilmegen, 2-i ata-anasynyń vaktsınatsııadan bas tartýyna baılanysty, 10 bala jasqa tolmaýyna baılanysty egilgen joq», - dep habarlady oblystyq qoǵamdyq densaýlyq saqtaý departameniniń baspasóz qyzmeti.
Infektsııalyq aýrýdyń odan ári taralýyn shekteý maqsatynda Aqtóbe oblysynyń qoǵamdyq densaýlyq saqtaý departamenti qyzylshaǵa qarsy ekpe almaǵan adamdardy anyqtady. Sonymen qatar, naýqastarmen baılanysta bolǵan 390 adamǵa medıtsınalyq baqylaý belgilendi.
«Qyzylshany emdeýdiń tıimdi jáne erekshe ádisi joq. Sondyqtan qyzylshadan jalǵyz jáne tıimdi qorǵaý ádisi vaktsınatsııa bolyp tabylady.Qazaqstanda qyzylshaǵa qarsy egý eki ret júrgiziledi. Birinshi ekpe 1 jasta jáne ekinshisi 6 jasta», - dedi baspasóz qyzmeti.
