Aqtóbede 2555 teńgeniń daýynan soń mert bolǵan jigitke qatysty sot boldy
AQTÓBE. QazAqparat - Aqtóbede 32 jastaǵy Áset Orazbaıdyń ólimimen aıaqtalǵan qylmystyq iske qatysty sot otyrysy bastaldy. Dámhanada tamaqtanyp, ishimdik ishken synyptasy 2555 teńgeni tólemeı, kólikke minip, ketip qalǵan. Arty Orazbaıdyń qaıǵyly ólimimen aıaqtalǵan oqıǵaǵa qatysty otyrys ótýde, dep habarlaıdy QazAqparat tilshisi.
Aqtóbe qalasyndaǵy dámhanalardyń birinde bolǵan qylmystyq oqıǵa týraly buǵan deıin jazylǵan bolatyn . Búgin qylmystyq is sotqa tústi. Jábirlenýshi Gúlnar Orazbaeva kúıeýi Áset Orazbaıdyń qasaqana óltirilgenine senimdi. «Ony 500 metrge deıin súırep ketken, balamyzdyń úlkeni 7 jasta. Kishkentaı egizimiz 2 jasqa toldy. Ortanshysy 5 jasta. Qazir amalsyzdan jumysqa shyqtym. Eden jýýshy bolyp júrmin»,- dedi Gúlnar Orazaeva.
Sot otyrysy kezinde jábirlenýshi taraptan qatysýǵa kelgen adamdar zalǵa syımady. Sýdıa Aldanov jábirlenýshi men aıyptalýshylarǵa quqyqtary men mindetterin túsindirdi.
«Naýryz aıynda saǵat 19:00 shamasynda aıyptalýshy Marat Abdýllın áriptesi Artýr Bereketovpen kafege baryp, spırttik ishimdik ishedi. Sol kafede olar jumys istep júrgen, birneshe jyl kórmegen tanysy Áset Orazbaıdy kezdestirip, birge otyrýǵa usynys jasaıdy. Orazbaı usynystan bas tartyp, eki saptyaıaq syrany tegin bergen. Degenmen tapsyrystyń aqshasy tolyq tólenbegen. 2555 teńgeni bermeı, esepti tolyq ótemegen olar dámhana ishindegi daıashyny balaǵattap, eseptespeı ketetinin aıtqan. Sol ýaqytta Artýr Bereketov kepil retinde jeke kýáligin tastap ketýdi usynady. Keıin ekeýi kafe aldyndaǵy kólikke minedi. Abdýllın júrgizip kelgen kóliktiń rýline Bereketov otyrǵan. Sol kezde Áset Orazbaı kólikke jarmasyp, súıretile júrgen, kólikti toqtatýdy suraǵan. Júrgizýshi jyldamdyqty basqan kezde qulap, oqıǵa ornynda qaza tapty»,- dedi memlekettik aıyptaýshy Jeńis Sarıev.
Aıta keteıik, Marat Abdýllın Qylmystyq kodekstiń «buzaqylyq», al Artýr Bereketov «abaısyzda kisi óltirý» baptary boıynsha aıyptalyp jatyr. Ekeýi de kólikke mingen kúıleri oqıǵa ornynan ketip qalǵan. Arada 10-15 mınýt ótkende polıtsııa qyzmetkerleri kúdiktilerdi ustady.
Eki aıyptalýshy da taǵylǵan aıyppen tolyq kelisip, qaza bolǵan Áset Orazbaıdyń týǵan-týystarynan keshirim surady. Sot-medıtsınalyq saraptama nájıjesinde 32 jastaǵy Áset Orazaıdyń ashyq bas-mı jaraqatyn alǵany, mańdaı, samaı, jelke tusy soǵylǵany, qan quıylyp, julynshaǵy synǵany bergili boldy. Sot otyrysy jalǵasyp jatyr.
