Aqtóbede 25 jyl boıy qańyrap turǵan ǵımarat mádenıet úıine aınaldy
AQTÓBE. QazAqparat - Aqtóbe oblysynyń Bestamaq aýylynda mádenıet úıi paıdalanýǵa berildi. Aýyldaǵy jınalystardy mektepte ótkizetin turǵyndar kásipkerge alǵysyn aıtty, dep habarlaıdy QazAqparat tilshisi.
Aqtóbe oblysy, Alǵa aýdany, Bestamaq aýylynda búgin mádenıet úıi paıdalanýǵa berildi. Osydan 25 jyl buryn jekeshelendirý kezinde ǵımarat jekeniń qolyna ótip ketti. Sol kúnnen bastap mádenıet úıi jumysyn toqtatyp, esigi ashylmady. Bıyl kásipker ǵımaratty memleketke tapsyryp, jóndeý júrgizildi, jylý júıesi jańartyldy.
«Bestamaqta týyp-ósip, qartaıdym. Bul ǵımarat 25 jyl boıy ashylmady. Qırap, búline bastaǵan kezde aýylǵa Aqtóbe oblysynyń ákimi Berdibek Saparbaev keldi. Kezdesý kezinde mán-jaıdy aıtyp, mádenıet úıin qaıtarýdy, halyq ıgiligine berýdi suradyq. Sebebi, jınalys, əkim esebi buǵan deıin mektepte ótti. Balalar bilim alatyn oryn biz úshin yńǵaısyz boldy. Ǵımarat jóndelip, halyq ıgiligine berilgen kúni qıyndyqtyń bári artta qaldy. aýyl halqy óz rızashylyǵyn bildirip jatyr»,- dedi aýyl turǵyny, zeınetker Ahmet Amanjolov.
Óńir basshysy Berdibek Saparbaev ǵımaratty memleketke qaıtarǵan kásipker Serik Úmbetqalıevke alǵysyn bildirdi.
«Týǵan jerge taǵzym» aktsııasy aıasynda kásipker bir kezderi memleketten satyp alǵan ǵımaratty keri qaıtardy. Tegin berdi. Ǵımarat tekserildi, jaramdylyǵy qaraldy. Keıin kúrdeli jóndeý jumystary júrgizildi. Mádenıet úıinen balet úıirmesin ashýdy josparlap otyrmyz. Ekinshi qabatta balalar sportpen shuǵyldana alady. Al mádenıet úıiniń zaly 250 oryndyq. Kitaphana bar»,- dedi Alǵa aýdany ákiminiń orynbasary Gúlnaz Sısenova.
Aıta keteıik, bir ǵımaratta kitaphana, mádenıet úıi jáne sport kesheni birigedi. Bul ǵımaratty jóndeý júrgizýge 100 mıllıon teńgeden astam qarjy jumsaldy.
