Aqtóbede 25 jyl otasqan áıelin pyshaqtaǵan adam bas bostandyǵynan aıyryldy

AQTÓBE. KAZINFORM – Sot otyrysynda jábirlenýshi keshirim berip, bas bostandyǵynan aıyrmaýdy surady. Keshirim bergenimen, sottalýshy 4 jylǵa bos bostandyǵynan aıyryldy.

Іs Aqtóbe qalalyq №2 sotynda qaraldy. Qalanyń 46 jastaǵy turǵynyna Qylmystyq kodekstiń «Densaýlyqqa qasaqana aýyr zııan keltirý» baby boıynsha aıyp taǵyldy. Іs materıalyna súıensek, aqtóbelik sol kúni ishimdik iship, úı aýlasyna kire beriste áıelimen janjaldasyp qalady. Ashýlanǵan er adam qolyndaǵy pyshaǵymen áıeliniń sol jaq ıyǵyn jaralaıdy. Áıeli qashqan kezde sońynan qýyp jetip, arqasyna birneshe ret pyshaqtady. Sot otyrysy kezinde sottalýshy bar kináni moıyndap, keshirim surady.

Sot kabınetindegi aqparatqa súıensek, jábirlenýshi óz sózinde shańyraq kótergenderine 25 jyl tolǵanyn, buǵan deıin de kúıeýiniń ózine qol kótergenin aıtty. Pyshaq jaraqatyn alǵan soń jaǵdaıy nasharlap, úıde júrgen alty jasar qyzynan jedel járdem shaqyrýyn suraǵan. Dál sol kezde sottalýshy óz qolyn kesip, syrtqa shyǵyp ketip, keıin qamaýǵa alyndy.

Jábirlenýshi áıel balalarynyń ákesine keshirim berip, bas bostandyǵynan aıyrmaýdy surady. Sot-medıtsınalyq saraptama kezinde densaýlyqqa aýyr jáne jeńil jaraqattar salynǵany dáleldendi.

Sot úkimimen 46 jastaǵy aqtóbelik Qylmystyq kodekstiń 106-baby 1-bóligimen kináli dep tanylyp, 4 jylǵa bas bostandyǵynan aıyrý jazasy taǵaıyndaldy. Jaza óteý orny - qylmystyq-atqarý júıesiniń ortasha qaýipsiz mekemesi. Sonymen birge ishimdikke áýes sottalýshy májbúrli túrde em qabyldaıdy.

Sot úkimi zańdy kúshine engen joq.

Aıta keteıik, Almaty oblysynda áıeli men enesin uryp-soqqan azamat ustaldy. Oqıǵa barysynda áıelge jáne onyń anasyna dene jaraqatyn salyp, sondaı-aq múlki qasaqana búlingen. Bolǵan jaıtqa baılanysty Qylmystyq kodekstiń eki baby boıynsha is tirkeldi.