Aqtóbede 24 mln teńgege «qaǵaz ushaq» músini qoıyldy
AQTÓBE. KAZINFORM — Aqtóbe qalasyndaǵy halyqaralyq áýejaı mańyna «qaǵaz ushaq» tárizdi shaǵyn sáýlet músini qoıyldy. Bul úshin bıýdjetten 24 mln teńge jumsaldy. Eki músinniń bıiktigi — 7 metr.
Aqtóbe qalasynda shaǵyn sáýlet músini birneshe jerde bar. Sonyń biri Halyqaralyq áýejaı mańyna qoıyldy.
— Bul ushaq túrindegi metaldan jasalatyn kishi arhıtektýralyq forma (MAF) Astana aýdanynyń ákimdiginiń tapsyrysymen Bókenbaı batyr kóshesine qoıyldy. «DıMad Company» JShS-i konkýrstyq negizde tapsyrys alyp, jasady. Bıiktigi — 7 metr, eni — 4,5 metr. Oǵan Astana aýdany 24 mln teńge bóldi, — dedi Aqtóbe qalasy ákiminiń baspasóz hatshysy Aıgúl Baımenova.
Aıta keteıik, shaǵyn sáýlet músinine tapsyrys berý qujattaryn Antıkor tekserdi. Jergilikti atqarýshy organnyń jumysynda jemqorlyq táýekelderi bar ekeni anyqtaldy. 2023 jyly Aqtóbe qalasy Almaty aýdanynyń apparaty men «Qaısar Relations» JShS arasynda 25 mln teńgeniń kelisimsharty jasaldy. Oǵan 8 shaǵyn sáýlet músinin salý josparlandy. Arada birneshe aı ótkende taǵy qosymsha kelisimshart jasalady. Onda 5 shaǵyn sáýlet músinine tapsyrys berip, 15 mln tg aýdaryldy. Kelisim boıynsha ornatqan kompanııa 1 jyl kútimin jasaıdy. Alaıda ákimdik 2024 jyldyń tamyz aıynda kútip ustaýǵa «Esıl-2018» JShS-ne 17,6 mln teńge bóldi.
Eske salsaq, Aqtóbeniń Muǵaljar aýdanynda ákimdik úı satyp alýǵa aqshó bólip, zańsyzdyqqa jol berdi. Arada bir jyl ótkende aqsha da, úı de joq bolyp shyqty.